Bermeo Tuna World Capital elkarteak (Bermeo Tuna) eta Rural Kutxako Gizarte Ekintzak lankidetza hitzarmena sinatu dute atunaren eta hegaluzearen balio katearen gizarte eta lurralde eragina indartzeko. Akordioaren bidez, Rural Kutxa Bermeo Tuna elkarteak ordezkatzen duen ekosistemara batu da bazkide estrategiko gisa, eta itsasotik bizi diren pertsonei eta komunitateei lotutako ekonomia urdin jasangarriaren aldeko apustua babestu du.
Bermeo Tuna elkartetik jakinarazi dutenez, bi erakundeen arteko aliantza ikuspegi partekatu batean oinarritzen da: balio katearen jasangarritasunak itsas baliabideen zaintza, pertsonen ongizatea eta lurraldeen garapen ekonomikoa uztartu behar ditu. "Bermeo Tunak Bermeotik eta Euskaditik sustatzen duen ikuspegia da hori, tokiko esperientzia nazioarteko lankidetzarekin eta jardunbide egokien transferentziarekin lotzen dituena", azaldu dute.
Hitzarmenak ikuspegi hori garatzen lagunduko du hezkuntzaren, gastronomiaren, berrikuntzaren eta lankidetzaren arloko proiektuen bidez. Lan ildo horiek balio katea herritarrengana hurbilduko dute, itsas eta gastronomia ondarea nabarmenduko dute, eta belaunaldi berriek haren etorkizunean parte hartzea sustatuko dute. Lankidetzak arreta berezia jarriko die proiektu horien hezkuntza eta komunitate eraginari, bai eta lurraldea dinamizatzeko, ezagutza sortzeko eta sektorearentzat aukera berriak sustatzeko duten gaitasunari ere.
Hitzarmena 2027ko abenduaren 31ra arte egongo da indarrean, eta Rural Kutxaren Hezkuntza eta Sustapen Funtsaren helburuen barruan kokatzen da. Haren babesari esker, Bermeo Tunaren hezkuntza, komunitate eta lurralde eragin handiagoa duten lan ildoak indartu ahal izango dira. Horrela, aliantzak elkartearen jarduna gidatzen duen ideietako bat indartzen du: jasangarritasuna portuetatik, komunitateetatik eta lurraldeetatik eraikitzea, eta ikasitakoa partekatzea, balio-katearen eraldaketa globalean laguntzeko.