Ziraun taldea, Zutik eta DJ Jonkass Ispasterko jaietan

Actualizado hace 4 minutos

Ispasterrek prest ditu hurrengo egunetarako jai-egitaraua. Uztailaren 24tik 27ra bitartean, herriak Santiago eta Santa Ana jaiak ospatuko ditu, adin guztietarako egitarau zabal batekin.

Festen hasiera ofiziala uztailaren 24an, ostirala, izango da. Arratsaldeko 19.00etan txupinazoa, pregoia eta Txanton Pipirriren igoera berezia egingo dira, Aittitta Makurra txarangak alaitutako herri danborradarekin batera. Jarraian, sagardoa, gazta eta intxaurrak banatuko dira bertaratutakoen artean. Gaua musikak hartuko du 23.00etatik aurrera Ziraun Taldea, Zutik erromeria eta DJ Jonkassen emankizunekin.

Uztailaren 25ean, Santiago Egunean, txistularien dianak esnatuko ditu ispastertarrak 9.00etan. Eguneko ekitaldi nagusien artean, Bizkaiko Emakumezkoen Trontza Txapelketa, harri-jasotzaileak eta Iparraldeko jokoen erakustaldia nabarmenduko dira 13.00etan. Arratsaldean, umeentzako puzgarriak eta frontoiko mus txapelketa jokatuko dira, eta gauean Etxepe, Argitu Erromeria eta DJ Aitxeren txanda izango da.

Santa Ana Egunean, uztailak 26, esku pelota partidekin ekingo zaio goizari Ispasterko harrobiko gaztetxoen eskutik, eta 13.00etan Tio Teronen Semeak taldeak umorea ekarriko du. Arratsaldean XXXV. Kross Lasterketa Herrikoia egingo da gazte eta nagusientzat, eta eguna amaitzeko Xaiborren ikuskizuna egongo da. Jaiei amaiera emateko, astelehenean, uztailak 27, Santanatxu Eguna ospatuko da: eskolarteko zesta-punta finalak, herri bazkaria, XVIII. Banakako Bolo Txapelketa, mozorro lehiaketa ezaguna eta Lisker erromeria egongo dira, gauerdian Txanton Pipirriren jaitsierarekin jaiak agurtu arte.

Antolatzaileek gogorarazi dute Gababus zerbitzua egongo dela Lea-Artibaiko herrietatik jaietara hurbiltzeko (Ispaster-Ea 4.30ean).