Urban Fest Zaramagaren bigarren edizioak gazteentzako doako 30 bat jarduera eskainiko ditu asteburuan Gasteizen

Gasteizko Zaramaga auzoa musikaz, kirolaz, artez eta kultura urbanoz beteko da Urban Fest Zaramaga jaialdiaren bigarren edizioarekin ostiralean eta larunbatean, irailaren 11n eta 12an. Egitasmoa 14 eta 30 urte bitarteko gazteei zuzenduta dago eta doako 30 jarduera baino gehiago eskainiko ditu.

Bi egunetan, Laudio plaza gazteen topagune eta partaidetzarako gune bihurtuko da, hainbat proposamenekin, hala nola kontzertuak eta DJ saioak, tailerrak, kirol jarduerak eta kultura urbanoari lotutako adierazpen artistikoak, Gasteizko Udaletik jakinarazi dutenez.

Urban Fest Zaramaga Gazteriaren Udal Zerbitzuak eta Gobernu Irekiaren eta Gizarte Etxeen Sailak bultzatzen dute, eta Eusko Jaurlaritzaren Etxebizitza eta Hiri Agenda Sailak onartutako auzoak berroneratzeko Inbertsio Estrategikoen Planean jasotako jarduketen barruan dago. Gainera, Gasteizko Udalak Zaramagaren hiri, gizarte eta ingurumen berroneratzean jarduteko duen konpromiso estrategikoetako bati erantzuten dio.

Jarduera guztiak Laudio plazan egingo dira, eta programa ostiralean hasiko da, 18:00etan, aisialdiko eta kultura urbanoko proposamen zabalarekin. Ordu horretatik aurrera, 17 urtez azpiko saskibaloiko 3x3 txapelketan parte hartzeko, kalistenia eta skateko entrenamendu libreez gozatzeko, parkourreko tailerrean parte hartzeko eta graffiti eta photocallerako prestatutako gunera hurbiltzeko aukera izango dute.

Cypher kolektibo bat egingo da19:00etatik aurrera, eta parte hartzaileek dantzarekin dituzten trebetasunak erakutsi eta publikoarekin partekatu ahal izango dituzte. 23:30ean amaituko den programazioan, Royal Rumble batailak eta kultura urbanoari lotutako hainbat proposamen ere izango dira.

LARUNBATA

'Urban Fest' jaialdiaren bigarren jardunaldia 12:00etan hasiko da, musika, arte urbanoa eta kirol jarduerak uztartuko dituen egitarauarekin. Goizean zehar, DJ Santa Simm eta DJ Xbeats arituko dira, arte urbanoaren merkatuan gazteek egindako produktuak jarriko dira, eta hainbat kirol proposamen antolatuko dira dute (skatea, muralismo, kalistenia, parkour eta 18 urtetik gorakoentzako 3x3 txapelketa).

Musika izango da protagonista 19:30etik 00:30era arte, La Sagrada Familia, Txime, Annekodotas, Nerepe, Safu, HUDA eta Hipogrifa & Suzio Tarik taldeekin.

Dantzako, kalisteniako, 3x3 saskibaloiko eta parkourreko tailerretan parte hartu nahi dutenek Gasteizko Udalaren webgune bidez izena emateko aukera izango dute ostegunera arte. Adingabeen kasuan, legezko tutoreen baimena beharko da.

Jardunaldian, gainera, kultura urbanoko artista entzutetsuak izango dira, hala nola Ongu, Pulpo, Huda eta Safu. Azken horretarako, 'Urban Fest' kontzertua berezia izango da, denboraldi batean egingo duen azken emanaldia izango baita.