Munduko Janariak ikastaroak munduko sukaldaritzetara eramango ditu azkoitiarrak

Actualizado hace 8 minutos

Azkoitiak Kulturarteko Jaia ospatuko du irailaren 19an, Garapenean Bidelagun azokarekin batera. Ekitaldi horren atarian, gainera, Munduko Janariak ikastaroa egingo da Elkargunean, beste herrialde eta kultura batzuetako gastronomia ezagutzeko eta bertako errezetak prestatzen ikasteko.

Gastronomia ezberdinak

Ikastaroa irailaren 7tik 10era egingo da, 16.00etatik 18.00etara.

Lau saioetan zehar, jatorri desberdinetako plater tradizionalak prestatuko dituzte parte-hartzaileek.

Lehen egunean, Marokoko gastronomia ezagutuko dute; bigarrenean, Saharako sukaldaritzara hurbilduko dira.

Hirugarren saioan, Afrikako hainbat herrialdetan ohikoak diren platerak prestatuko dituzte, eta azken egunean, euskal gastronomiari keinu eginez, marmitakoa izango da protagonista.

Izen ematea zabalik

Saio bakoitzean hamar laguneko taldeak osatzea da antolatzaileen asmoa, eta gutxienez bost pertsonako taldea beharko da ikastaroa egiteko.

Parte-hartzea doakoa da, eta baldintza bakarra 16 urtetik gora izatea da.

Izen-ematea dagoeneko zabalik dago esteka honetan: https://forms.gle/J7u797xYpu6js2WS7.

Irakasle eta sukaldari rolak

Gainera, ez da beharrezkoa lau saioetan parte hartzea: interesa dutenek nahi duten eguna edo janari mota aukeratu ahal izango dute.

Kanpoko gastronomiei dagozkien saioetan, Azkoitian bizi diren etorkinek hartuko dute irakasle eta sukaldari rola, beren herrialdeetako errezetak eta gastronomia bertatik bertara ezagutarazteko.