Gasteizko Udalak TAOren kontrola indartuko du kamerak dituzten bi ibilgailu berrirekin

Gasteizko Udalak TAO kontrolatzeko bitartekoak indartuko ditu matrikulak automatikoki irakurtzeko kamerak dituzten bi ibilgailu berri gehituta. Horrela, zerbitzuak bi unitate izatetik lau izatera igaroko da, 2025eko amaieran egindako handitzearen ondoren erregulatutako aparkaleku eremu osora iristeko.

Tokiko gobernu batzordeak ostiral honetan onartu du kameren bi sistema berriak kontratatzeko espedientea, 73.084 euroko aurrekontuarekin. Aldi berean, Gasteizko Udalak beste lizitazio bat jarri du abian ekipo horiek instalatuko diren bi ibilgailuak erosteko.

TAOren hedapenaren ondorioz, araututako aparkaleku plazen kopurua 6.000 ingurutik ia 11.000ra igaro da, hau da, plazen kopurua ia bikoiztu egin da. Gehikuntza horren ondorioz, eskuragarri dauden baliabideak indartu behar dira, bai lehendik araututa zeuden eremuak, bai sisteman sartutako auzo berriak kontrolatu ahal izateko.

Izaskun Reyes Mugikortasuneko zinegotziak azaldu duenez, "nabarmen handitu dugu TAO, eta orain kontrolerako bitartekoak errealitate berri horretara egokitu behar ditugu. Orain arte kamerak zituzten bi ibilgailu genituen, eta lautara pasako gara. Araututako eremu osora iritsi nahi dugu, eta kontrola ez dadila soilik kale edo auzo jakin batzuetan kontzentratu".

Reyesek gogorarazi du TAOren helburua ibilgailuak txandakatzea eta aparkatzeko lekuak erabilgarri egotea dela. "Ondo funtziona dezan, beharrezkoa da arauak errespetatzea. Eta horretarako baliabide nahikoak izan behar ditugu. Ezin dugu araututako plazen ia bikoitza izan eta handitu aurreko ibilgailu berberekin lanean jarraitu", adierazi du.

Sistema berriek aukera emango dute aparkatuta dauden ibilgailuen matrikulak automatikoki irakurtzeko eta TAOren erregulazioari dagokionez haien egoera zein den egiaztatzeko. Hornidura kontratuak gehienez ere sei hilabeteko epea aurrez ikusten du, esleitzen denetik zenbatzen hasita.

Bi ekipo berri horiek eta dagozkien ibilgailuak gehituta, Gasteizko Udalak lau unitate mugikor izango ditu TAO eremu osoan kontrol lanak egiteko, eta, horrela, zerbitzuaren baliabideak egungo zabalkundera egokituko dira.