Zergatik itzuli ditu Arabako Ogasunak aurten 193 milioi euro baino gehiago?

Actualizado hace 9 minutos

Arabako Ogasunak 193,3 milioi euro itzuli dizkie aurten zergadunei errenta kanpainan, eta aurkeztutako aitorpenen kopuruak ere gora egin du. Kanpainaren balantzeak erakusten du itzulketek bildutako dirua gainditu dutela, zergadunen aldeko saldoarekin amaituz.

"Iaz zergen berrikuspena onartu ondoren, errentaren kanpainak zergadunen aldeko saldoa eman du, aurreko kanpainakoa baino handiagoa". Hala nabarmendu du Itziar Gonzalo Ogasun, Finantza eta Aurrekontu Saileko foru diputatuak kanpainaren balantzearen aurkezpenean. Arabako Ogasunak 193 milioi euro baino gehiago itzuli dizkie zergadunei errenta kanpainan. Aurkeztutako aitorpenen kopurua %2,14 igo da: 204.752 aitorpen aurkeztu dira, 4.354 gehiago iaz baino.

Foru diputatuak zerga berrikuspenaren ondorioz zergadunengan eragin positiboa izan duten neurriak aipatu ditu, «Arabako herritarren poltsikoetan zuzenean nabaritu direnak. Ekarpen fiskala arintzen duen pakete batez ari gara, -batez ere errenta ertain eta baxukoentzat-, zerga sistemaren ekitatea indartzen duena eta gehien behar dutenei laguntzen diena, testuinguru ekonomikoa zorrotza da-eta".

Gonzalok bere mintzaldian azpimarratu duenez, "kanpainaren garapenean normaltasuna izan da nagusi, eta horri esker oso balorazio ona eta positiboa egin dezakegu".

Ildo horretan, Gonzalok azpimarratu duenez, "herritarrak kanpainaren erdigunean jartzea izan da lehentasuna, zergadunen beharrei erantzungo dien zerbitzu eskuragarri, hurbil eta eraginkorra eskainiz. Bai aurrez aurreko arretaren bidez, bai kanal digitalen bidez, izapideak errazteko, zalantzak argitzeko eta herritarrei une oro laguntzeko lan egin dugu".

Errentaren balantze ekonomikoa

Foru Ogasunak 136.631 aitorpen egin ditu guztira errenta kanpainan zehar, eta horietatik 116.884 Rentafácil modalitatekoak izan dira, hau da, Foru Ogasunak egindako proposamenak. «Zifra horren atzean, lan handia dago informazio fiskala kudeatzeko, aztertzeko eta tratatzeko, eta horrek agerian uzten du datuaren kalitatea, funtsezko elementua baita administrazio efizienteago, gardenago eta hurbilago baterantz aurrera egiteko».