Vitoria-Gasteizko Udalak turismo zinematografikoko ibilbideak programatuko ditu, Arabako hiriburuan filmatutako film esanguratsuenetan oinarrituta. María Nanclares Gasteizko Ekonomia Sustapen, Enplegu, Merkataritza eta Turismo zinegotziak eta Aitziber Salazar EH Bilduko zinegotziak eman dute horren berri prentsaurrekoan. Izan ere, Udal-gobernuak EH Bildurekin 2026an hitzartutako aurrekontu-akordioari esker bideratuko da egitasmoa.
“Gasteiz nazio baitako eta nazioarteko erreferente gisa finkatu da azken urteotan ikus-entzunezko ekoizpenaren esparruan. Udalak 15 urte baino gehiago daramatza gure hiria eta ingurua filmatze-lanetarako plato gisa bultzatzen, Film Officeren eskutik. Arabako Foru Aldundiak bat egin du gure misioarekin, Vitoria-Gasteiz Araba Film Commission sortuta. Orain, lurralderako garapen ekonomikorako aukera hori sendotzeko eta ikusarazteko, zinema protagonista izango den ibilbide turistiko batzuk jarriko ditugu abian”, azpimarratu du María Nanclaresek.
EH Bildu udal-taldeko zinegotzi Aitziber Salazarrek, bestalde, adierazi duenez, “ibilbide hau bisitatzen gaituztenei zein hemen bizi garenoi zuzenduta dago. Izan ere, egunero igarotzen garen kaleetan ere gauza berriak ezagutu ditzakegu. Gainera, ikus-entzunezko jarduerak Gasteizerako itzulkin kultural, sozial eta ekonomikoa izatea bilatzen dugu, zinemarekin lotutako pertsonen eta profesionalen lana ezagutzen eta baloratzen laguntzeko”.
Gasteizko Udal Turismo Bulegoak ibilbide horiek programatuko ditu etorkizuneko bisita gidatuen programazioan. Bisita erakargarriak izango dira, bai zinemazaleentzat, bai publiko orokorrarentzat, gidari akreditatuek zuzendutakoak, eta ordubete eta hogeita hamar minutuko iraupena izango dute.