Mendatako gazteek Busturialdea ezagutzeko aukera izango dute eskualdeko udalekuekin

Actualizado hace 7 minutos

Mendatako Udalak Busturialdeko Udalekuen edizio berriaren izen-ematea zabaldu du. 9 eta 14 urte arteko gazteei zuzendutako kirol eta aisialdi programa izango da, eta ekainaren 29tik uztailaren 10era bitartean egingo da Busturialdeko hainbat tokitan.

Udalekuen helburua da gaztetxoek udako oporraldia modu aktiboan eta osasuntsuan disfrutatzea, eskualdeko beste herrietako gazteekin harremanak sendotuz eta Busturialdeko natur guneak eta aisialdirako aukerak ezagutuz. Horretarako, egunero autobusez mugituko dira eskualdeko leku desberdinetara.

Programak hainbat jarduera izango ditu, hala nola stand up paddle, kayak, hondartzako kirolak, mendira irteerak edo uretako ohe elastikoak, besteak beste. Ekintzak Laidan, Bermeon, Mundakan, Arrolan, Sukarrietako inguruan edo Ereñozarren egingo dira, besteak beste.

Jarduerak goizeko 10.00etatik 14.00etara izango dira, nahiz eta autobusaren ordutegia eguneko helmugaren arabera aldatu egingo den. Irteerak 9.15 eta 9.45 artean izango dira.

Izen-ematea maiatzaren 29ra arte egongo da zabalik, eta informazio gehiago Mendatako Udalean eskuratu daiteke. Prezioari dagokionez, erroldatuentzat 139,15 eurokoa izango da, eta ez erroldatuentzat 278,30 eurokoa.

Izen-ematea esteka honen bidez egin daiteke: https://labur.eus/2iono3tz