Marokon espetxeratutako bederatzi sahararren senideentzako babes neurriak aktibatu ditu Arabako Aldundiak

Arabako Foru Aldundiak Giza Eskubideen Defendatzaileei Eragiteko eta Babesteko Arabako Mekanismoaren jarduera berri bat onartu du, Marokon espetxeratutako bederatzi sahararren senideei laguntzeko. Jardueraren helburua da espetxeetan zigorra betetzen ari diren pertsonen senitartekoen joan-etorriak, egonaldia eta laguntza erraztea.

Foru erakundeak jakinarazi duenez, espetxeratuak Gdeim Izik taldeko kideak dira; espetxean urteak daramatzaten Saharako giza eskubideen aldeko ekintzaileek osatzen dute taldea. NBEko hainbat erakundek zalantzan jarri dute atxiloketa horien legezkotasuna, eta kezka adierazi dute espetxealdiko baldintzen eta luzaroko isolamendu kasuen eta torturen edo tratu txarren salaketen inguruan.

Atxilotuak hainbat espetxetan sakabanatuta eta sorleku familietatik urrun daudenez, zaila da haiekin harremanetan jartzea eta haien osasun egoeraren jarraipena egitea. Hori dela eta, Arabako Aldundiaren arabera, egungo testuinguruan, "berebiziko garrantzia hartzen du senideen laguntzak eta gertutasunak", familia horietako askok aspalditik hartzen baitituzte beren gain laguntza eta zaintza lanak, baldintza bereziki konplexuetan.

Giza Eskubideen Defendatzaileei Eragiteko eta Babesteko Arabako Mekanismoa Arabako Foru Aldundiko Berdintasun, Euskara eta Gobernantza Sailak bultzatutako tresna bat da, azkar erantzutea ahalbidetzen duena giza eskubideak eta oinarrizko askatasunak modu baketsuan sustatzen dituzten pertsonei eta kolektiboek jasaten dituzten larrialdi egoerei aurre egiteko. Helburua da Arabako lankidetzari lotutako babes eta eragin neurriak babestea eta giza eskubideak defendatzen dituztenek beren lana segurtasun handiagoz egin dezaten laguntzea.

Saharako Errepublika Arabiar Demokratikoaren (SEAD) Lagunen Elkarteak eskatu du laguntza, eta 8.000 euroko zuzkidura ekonomikoa du. Jarduera saharar erakundeekin lankidetzan garatuko da, giza eskubideen defentsan eta espetxeratuei eta haien senideei laguntza ematen dihardutenekin, hain zuzen ere.