Inauteriak baino lehen Kaldereroak eta Inude eta Artzaiak daude giroa berotzeko

Aurten aurreko urtean baino lehen ospatuko dira Inauteriak eta, horrenbestez, denbora gutxi izan dute Hungariako kaldereroen konpartsa tradizionalak eta Kresala Elkarteko Iñude eta Artzaiek asteburu honetan Alde Zaharreko kaleetan egingo duten ikuskizuna prestatzeko. Astebeteko entseguak egingo dituzte eta, ondoren, Hungariako kaldereroen konpartsa tradizionala osatzen duten 412 partaideek, gaueko 21:30etik aurrera, kalez kale arituko dira zartagi hotsak zabalduz.

"Raimundo Sarrieguiren doinuak eta Victoriano Iraolaren "Begi urdin bat" interpretatuko ditugu" azaldu digu Gipuzkoako Kale Nagusian Aizpea Leizaolak, Hungariako Kaldereroen Konpartsa Tradizionalaren ordezkariak. 19 tributan banatzen dira eta guztiek, gaueko 22:00etatik aurrera, ezarriko dute kanpamentu nagusia Konstituzio Plazan. "Ordu horretan, Juan Antonio Antero, erreginaren paperan, hitzaldi berezi baten bidez agurtuko ditu herritarrak eta donostiarrek Kaldereroen errepertorioa abestuz erantzungo diote", Donostiako Udal Musika eta Dantza eskolaren bandak lagunduta. Amaia Antero eta Ibon antero izango dira erreginaren damak.

Kanpamentua amaituta, konpartsa tradizionalak Parte Zaharreko kaleetatik desfilatzen jarraituko du ibilbidea amaitu arte, 01:00etan Gaztelubideren aurrean.

Igandean Inude eta Artzaien txanda helduko da. Kresala Elkarteko konpartsak Parte Zaharretik desfilatuko du, eguerdiko 12:00etatik aurrera. "Guztira, 200 partaide inguruk osatzen dugu konpartsa" azaldu digu Joxe Muruak, Kresala Elkarteko kide eta Iñude eta Artzainak Konpartsako arduradunak. "Segizioa inude eta artzainen 30 bikotek, 60 danbor eta garaiko pertsonaiek osatuko dute", hala nola, alkatea eta bere emaztea, idazkaria, gotzaina, apaiza, eliztarrak, mikeleteak, ontzi-garbitzailea edo garbitzailea, besteak beste.

Ande Zaharrean ez ezik, Gros eta Amara auzoetan zehar beste bi konpartsa egongo dira. Groseko konpartsak 11:15ean hasiko du bere ibilbidea Txofre kaletik, eta berriz, Ikasbide Ikastolak antolatutako konpartsak 11:30ean Loiolako Erriberetako ikastolako egoitzatik. Antiguako Inude eta Artzainak otsailaren 10an aterako dira kalera, goizeko 11:30etik aurrera.