Gasteizko Udalak 75.000 euro banatuko ditu nekazaritzako ekoizpen eta banaketa sektorean enplegua sortzea sustatzeko

Actualizado hace 4 minutos

Gasteizko Udaleko gobernu batzordeak nekazaritzako ekoizpen eta banaketa sektorean enplegua sortzea sustatzeko laguntza lerroaren bigarren deialdia onetsiko du ostiralean, maiatzaren 15ean, eta guztira 75.000 euro bideratuko ditu, EH Bildurekin 2026an lortutako akordioari esker.

"Aurten, berritasun gisa, nekazaritzako produkzioaren sektorean jarduten duten irabazi asmorik gabeko elkarteei emango diegu laguntza horiek jasotzeko aukera", aurreratu du Maria Nanclares Sustapen Ekonomiko, Enplegu, Merkataritza eta Turismoko zinegotziak.

Gainera, nabarmendu duenez, inbertsioetarako gehieneko laguntza 9.000 eurotik 15.000 eurora igoko dute. "Horrela, nekazaritzako enpresek eta elkarteek 24.000 euro lortu ahal izango dituzte 2026an", gaineratu du.

Bestalde, EH Bilduko zinegotzi Ekaitz Diaz de Garayoren hitzetan, "laguntza horien bitartez, bultzada garrantzitsu bat ematen diogu tokiko lehen sektoreari, elikadura subiranotasunari eta kalitatezko enplegua sortzeari. Nekazaritza-sektorearekin dugun konpromisoa berresten dugu eta, gainera, 15.000 eurora arte handitzen dugu nekazaritza lanetarako ekipamendua erosteko diru laguntza. Aurrera egiten jarraitzen dugu, eta balioa ematen diogu Gasteizko lehen sektorearen funtsezko eginkizunari".

Ekonomia Sustapen, Enplegu, Merkataritza eta Turismo Sailak 9.000 eurorainoko diru laguntza emango du nekazaritzako jarduerak egiten dituzten Gasteizko lantokietan pertsonak kontratatzeko, gutxienez hiru hilabeterako, eta diruz lagunduko dira 2025eko abenduaren 16tik 2026ko ekainaren 30era bitartean sinatzen diren kontratuak (bi egunak barne).

Lehentasuna izango dute beren jarduera eredu ekologikoaren arabera garatzen duten enpresek, eta gehienez ere enpresa bakoitzeko 3 kontratuk jasoko dute dirulaguntza.

PRODUKZIO EKOLOGIKOA

Era berean, Gasteizko Udalak 15.000na eurorainoko diru laguntzak emango dizkie produkzio ekologikoaren ereduaren arabera lan egiten duten enpresei edo, halakorik ezean, ohiko ereduaren arabera lan egiten duten, baina eredu ekologikorako birmoldaketa prozesua hasi duten enpresei, besteak beste, makinak eta lursailak erosteko, instalazioak gaitzeko, aholkularitza jasotzeko, ikerketa proiektuak egiteko edo digitalizaziorako.

Diruz lagun daitezkeen gastuak 2025eko abenduaren 16tik 2026ko irailaren 15era bitartean egindakoak izango dira. Itzuli beharrik gabeko eta konkurrentzia sinpleko diru laguntza horiek bateragarriak izango dira beste laguntza batzuekin.

Deialdia Arabako Lurralde Historikoaren Aldizkari Ofizialean argitaratu eta hurrengo egunean hasi eta irailaren 15ean amaituko da eskaerak aurkezteko epea. Udal egoitza elektronikoaren bidez zein udal bulego teknikoetan eta gizarte etxeen sareko herritarrei arreta emateko bulegoetan aurkeztu ahal izango dira.