Gasteizko 21 Zabalgunea udal hirigintza sozietatearen administrazio kontseiluak Alde Zaharrean gazteentzako alokairuko etxebizitzak sustatzeko programaren oinarriak onartuko ditu ostiralean, urriaren 30ean, udal gobernuaren eta EH Bilduren arteko akordioari esker. Programa 21 Zabalguneak sustatzen dituen blokeetan eta pixkanaka birgaituko dituen blokeetan oinarrituko da, alokairuaren formularen bidez gazteentzako ohiko bizileku iraunkor gisa erabiltzeko.
Borja Rodriguez Hiri Eredu, Hirigintza eta Etxebizitzaren zinegotzi eta 21 Zabalguneko presidenteak adierazi du ekimenaren helburuak direla "etxebizitzen funtzio soziala berreskuratzea, alokairu erregimenean erabilgarri jarriz, etxebizitza duina eskuratzeko eskubidea bermatzea, alokairu formularen bidez, eta programaren hartzaile diren gazteen diru sarreren mailara egokitutako alokairu errenta sustatzea". "Horrez gain, auzoko biztanleria gaztetzea ere lortu nahi da", gaineratu du.
Era berean, Xabier Ruiz de Larramendi EH Bilduko zinegotziak azaldu du alokairu babestuko programa propio bat dela, "Alde Zaharrean eraikitzen edo erabat birgaitzen ari diren etxebizitza blokeak gazteen zerbitzura jartzeko balioko duena".
"18 eta 35 urte bitarteko pertsonei zuzenduta dago, eta hilean 200 eta 550 euro bitarteko alokairuak izango dituzte, betiere diru sarreren %30 gainditzen ez badute. Gazteei alokairu eskuragarria eta egonkorra eskainiko dien programa bat da, emantzipatzeko eta bizitza proiektu propio eta independenteei ekiteko aukera emango diena", esan du.
Bada, 21 Zabalgunearen webgunean argitaratu ondoren, bi hilabeteko epea irekiko da eskatzaileek izena eman dezaten. Epe hori amaituta, batzorde tekniko bat arduratuko da inskripzio bakoitzaren baremazioa egiteaz, eta, 21 Zabalguneko kontseiluak onartu ondoren, zerrenda argitaratuko da baldintzak betetzen dituzten onartutako pertsonekin. Zerrenda horretan eskaera bakoitzak lortutako puntuazioa jasoko da, bizikidetza unitatearen osaerara egokitzen den etxebizitza mota esleitzeko orduan.
BALDINTZAK
Prozedura publikoan parte hartu nahi duten pertsonek edo bizikidetza unitateek honako baldintza hauek bete beharko dituzte eskabideak aurkezteko azken egunean: kideren bat adinez nagusia izatea eta eskaera egiteko unean 36 urte baino gutxiago; bizikidetza unitateko kideren bat gutxienez hiru urtez Gasteizen erroldatuta izatea; bizikidetza unitateko pertsonek ez izatea etxebizitza propioa eta PFEZaren azken zergaldian 820,5 eta 51.282 euro bitarteko diru sarrera haztatuak izatea, hau da, Lanbide arteko Gutxieneko Soldata baino hiru aldiz handiagoak gehienez.
Baremazio irizpideei dagokienez, programako eskatzaileen zerrendan daramaten antzinatasuna, adimen desgaitasuna edo gaixotasun mentala duten pertsonen etxebizitza premia berezia duten kolektiboetako kide izatea, Alde Zaharrean eguneroko lantokia izatea, Alde Zaharrean bertan bizi den odol ahaidetasuneko edo ezkontza ahaidetasuneko lehen mailako senide bat izatea, eta duela 3 urte baino gehiagotik gurasoen etxean Alde Zaharrean bizi diren gazteak izatea dira.
Etxebizitzak esleitzeko kontuan izango dira etxebizitzen azalera eta bizikidetza unitatea osatzen duten kideen kopurua. Etxebizitzak esleipendunen ohiko etxebizitza iraunkorrerako erabiliko dira, eta alokairu epea zazpi urtekoa izango da gutxienez, eta luzatu egin ahal izango da 29/1994 Legearen 10. artikuluan ezarritako baldintzen arabera.
Bizikidetza unitatearen diru sarrera haztatuen eta esleitutako etxebizitzaren tamainaren arabera zehaztuko da esleipendunek hilero ordaindu beharreko errenta. Zenbateko horiek hilean 200 eurotik (logela bateko etxebizitza baten preziorik baxuena, urtean 12.820,50 eta 17.094 euro arteko diru sarrerak dituzten eskatzaileentzat) 550 eurora bitartekoak izango dira. Azken kopuru hori urtean 42.736 eta 51.282 euro arteko diru sarrerak dituzten eskatzaileek ordainduko dute, hiru logelako edo gehiagoko etxebizitza baten truke.
Nolanahi ere, prezioa ez da izango bizikidetza unitatearen urteko diru sarrera gordinen %30 baino handiagoa, eta pertsonaren batek etxebizitza gisa laguntza publikoak jasotzen baditu, zenbateko hori osorik ordaindu beharreko errentaren parte izan beharko da.