Errenteriako Gaztaño auzoak festa berezia hartuko du irailaren 12an. Garagaztaño izenarekin, artisau-garagardoaren inguruko egun osoko jaia antolatu dute auzotarrek, eta hitzorduak esanahi berezia izango du: Gorka eta Jon Telletxea anaien omenez egingo dute, biak azken urtean zendu ostean.
2025eko irailaren 13a eta 2026ko martxoaren 2a egun gogorrak izan ziren Gaztaño aldean. Iraileko larunbat hartan, Gorka Telletxea bizikletan ibiltzera atera zen, ia larunbatero egin ohi zuen bezala, baina ez zuen ibilbidea amaitzeko aukerarik izan. Bihotzak betiko atseden hartzea erabaki zuen. Hilabete batzuk geroago, 2026ko martxoaren 2an, Jonek ere bide bera hartu zuen, bihotzak atseden hartu baitzuen.
Bi anaien heriotzak hutsune handia utzi du inguruan, baina haien oroimena bizirik mantentzeko eta elkarrekin hainbeste gozatu zuten uneak ospatzeko baliatuko dute Garagaztaño. "Bi anaiak izar artean egongo dira garagardo-pitxer bana eskuetan", adierazi dute antolatzaileek, eta haien omenez topa egitea izango da egunaren ardatza.
Egitaraua
Gaztañoko Jai Batzordearekin elkarlanean prestatutako egitarauak artisau-garagardoa izango du protagonista. Inguruko hainbat garagardogileri egin diete gonbidapena, eta haiek beren garagardo mota eta proposamenak eramango dituzte festara. Edariak dastatzeko, barran erositako edalontzia erabili beharko da, eta garagardogile bakoitzak bere produktuen prezioa ezarriko du.
Eguerdian, berriz, bazkaria egingo dute. Horretarako, beste artisau-garagardo batzuk eskainiko dituzte, eta edari horiek bazkariaren 25 euroko prezioaren barruan egongo dira. Garagardoa edan nahi ez dutenentzat ere bestelako aukerak izango dira, hala nola ura eta sagardoa.
Bazkarirako txartelak irailaren 7ra arte egongo dira salgai Arkaitza, Reyna eta Leku Zaharra tabernetan. Antolatzaileek garaiz eskuratzea gomendatu dute, bazkarirako toki kopurua mugatua izango baita.
Bazkalostean, giro lasaiagoa nagusituko da Benetan bikotearen musikarekin. Arratsaldeak aurrera egin ahala, ordea, mahaiak eta aulkiak jasoko dituzte eta oholtza prestatuko dute gaueko zuzeneko emanaldirako Peppermint Sextet taldearekin
Iluntzean, gainera, afaltzeko aukera izango da Gaztañoko auzotarren eskutik prestatutako bokata eta hanburgesekin. 22.00etan, berriz, auzotarrek prestatutako bideoa proiektatuko dute, Gorka eta Jon Telletxea anaien oroimena eta haien inguruko bizipenak protagonista izango dituen ikus-entzunezkoa.
Azkeneko orduak
Une horretan egingo dute, halaber, eguneko zozketa. Artisau-garagardoa dastatzeko edalontzia erosten dutenek zozketan parte hartzeko zenbaki bat jasoko dute, eta irabazleak artisau-garagardo sorta bat eramango du etxera.
Musikak ere izango du bere tartea gauean. Herriko Ximaur taldeak girotuko du Gaztañoko gunea, eta zuzeneko emanaldi horrekin emango diote amaiera jaiari. Antolatzaileen asmoa da festa gauerdi aldera amaitzea, inguruko auzotarrei ahalik eta enbarazu txikiena eragiteko.
Garagaztaño ez da, ordea, artisau-garagardoaren inguruko festa hutsa izango. Antolatzaileek Gorka eta Jon Telletxearen oroimena ospatzeko eta auzotarren arteko elkartasuna indartzeko eguna izatea nahi dute.
Bide batez, Jon Telletxea anaia gazteenak behin baino gehiagotan aipatu zuen Gaztañon Maritxu Mozkor jai txikiak antolatzeko nahia zuela. Oraingoan, haren erronkari heldu diote auzotarrek, eta Gorkak ere gustuko izango zuen artisau-garagardoen azoka ekarri dute auzora.
Antolatzaileek eskerrak eman dizkiete festa antolatzen lagundu duten guztiei, bereziki Gaztañoko auzo-elkarteari eta Jai Batzordeari, baita Udane Ansa Iragorri artistari ere, kartela eta logoa prestatzeagatik. Bazkariko jakiak prestatuko dituzten Gaztelu ostatuko eta Ibon Appetit-eko lagunei ere aitortu nahi izan diete egindako lana.