Denbora gehiegi ematen duzu mugikorrarekin?

Hiper-konektatuta bizi garen garai honetan, telefono mugikorra gure gorputzaren luzapen bihurtu da ia. Deiak egiteko tresna soil izatetik, gaur egun entretenimendurako, informazioa jasotzeko eta harreman sozialak izateko dugun baliabide nagusia izatera igaro da.

Hala ere, plataforma horien diseinua gure arreta ahalik eta denbora gehienez bereganatzeko prestatuta dago. Egunero erabiltzen ditugun aplikazioek, batez ere sare sozialek, algoritmo oso sofistikatuak eta sari aldakorretan oinarritutako mekanismoak erabiltzen dituzte. Mekanismo horiek dopamina-mailaren igoera nabarmenak eragiten dituzte garunean, pantailan hatza irristatzen dugun edo "Me gusta" bat jasotzen dugun bakoitzean. Horrek ikuspegi biologikotik azaltzen du zergatik egiten zaigun hain zaila gailua uztea.

Zenbat orduz erabiltzen duzu egunean?

• 3 ordu baino gutxiago: Kontrola zure esku dago. Tresna praktiko gisa erabiltzen duzu, zure egunerokoaren kontrola galdu gabe.
• 3 eta 4 ordu artean: Mendekotasuna garatzeko arriskuan zaude. Oraindik deskonektatzeko gai zara, baina ohitura errotzen hasi da.
• 4 eta 5 ordu artean: Adituek mendekotasunaren atalasea tarte horretan kokatzen dute. Kontrola galtzen has zaitezke, eta horrek zure aldarteari eragin diezaioke.
• 6 ordu baino gehiago: Alerta-mailarik handiena da. Erabilera horrek zuzenean eragin diezaieke lo-orduei, lan-errendimenduari eta harreman pertsonalei.

Nola murriztu dezaket mugikorraren erabilera?

1. Jakinarazpenak desaktibatu: Beharrezkoak ez diren jakinarazpen guztiak desaktibatzea komeni da, bereziki sare sozialetako eta jokoetakoak. Deiak eta zuzeneko mezuak bakarrik utz ditzakezu aktibo; horrela, kontrola berriro zure esku izango duzu.

2. Mugikorra zuri-beltzean jarri: Irisgarritasun-ezarpenetan gris-eskala aktibatzea baliagarria izan daiteke. Kolore biziak kenduta, interfazea ez da hain erakargarria izaten, eta garunak interes txikiagoa agertzen du.

3. Erabilera-mugak ezarpenetan ezarrri: Ezarpenetan eguneroko denbora-mugak jar ditzakezu aplikazio jakin batzuetarako. Muga gainditzean aplikazioak automatikoki blokeatzeko aukera ere aktiba dezakezu.

4. Mugikorra logelatik kanpo utzi: Lo egitera joatean mugikorra logelatik kanpo uztea komeni da. Pantailen argi urdinak melatoninaren jariaketa inhibitzen du zuzenean; melatonina loaren zikloa erregulatzen duen hormona da.

5. Otorduetan eta elkarrizketetan mugikorra urrun uzteko ohitura hartu: Gailua eskura ez edukitzeak erreflexuz hartzeko joera saihesten laguntzen du.

6. Gehien erabiltzen dituzun aplikazioak bigarren mailako pantailetara eraman: Hasierako pantaila garbitzea komeni da. Sare sozialak bigarren mailako karpetetan gordetzea ere komeni da, mugikorra desblokeatzean ikusten dituzun lehen aplikazioak izan ez daitezen.

KLIK EGIN AURRETIK PENTSATU. PARTEKATU BAINO AURRETIK EGIAZTATU.