Bederatzi jarduera, martxoaren 1etik 29ra bitartean hiriko hainbat gunetan

Gasteizko Udalak Zu eta ni, gu, aurrera! kanpaina antolatu du martxoaren 8ko Emakumeen Nazioarteko Eguna dela eta, eta bederatzi jarduera egingo ditu martxoaren 1etik 29ra bitartean hiriko hainbat gunetan, Ana Lopez de Uralde Berdintasun zinegotziak iragarri duenez.

Lopez de Uralderen hitzetan, "mugimendu feministak, emakumeen elkarteek eta era askotako emakume anonimoek gure eskubideak aldarrikatzeko, oraindik ere bizirik jarraitzen duten genero desberdintasunak salatzeko eta, egunez egun, gure ahalduntzea sustatzeko eta, horrenbestez, gizarte bidezkoagoa eta berdinzaleagoa indartzeko modu indibidualean eta kolektiboan egin duten eta egiten dugun lana ikusarazi eta aitortu nahi dugu".

ANTOLATUTAKO JARDUERAK

M-8a dela-eta antolatutako jardueren egitaraua martxoaren 1ean hasiko da, Maitena Monroy fisioterapeuta eta emakumeen aurkako indarkerian adituak emango duen Autodefentsa feminista ikastaroarekin, Emakumeen Etxean.

Martxoaren 6an, 14 urtetik gorako gazteentzako Itzal(iko) bagina antzezlana izango da Salburua gizarte etxean, eta martxoaren 13an Miren Arangurenek genealogiari eta mugimendu feministak Euskal Herrian izandako ibilbideari buruzko lantegia eskainiko du Emakumeen Etxean.

Silvia Bilbao begirale eta hezitzailearen Boxeo como herramienta de crecimiento lantegia eskainiko die 14 eta 18 urte bitartekoei Emakumeen Etxean martxoaren 15ean eta 22an, eta Monica Ramos antropologoak Claves de supervivencia para envejecimiento como te dé la gana hitzaldia eskainiko du toki berean martxoaren 16an.

Ramosek berak Juntas creamos claves para envejecer como te dé la gana lantegia eskainiko du leku berean biharamunean, martxoaren 17an, eta Nora El Hourchek zuzendutako 'HLM Pussy' filma proiektatuko da Florida zinema aretoetan martxoaren 18an.

Martxoaren 28an, No Ni Ná, Una copla diçidente p'acompañâh un guen puxero sorkuntza kolektiboko ikuskizuna izango da Iparralde gizarte etxeko Beñat Etxepare Antzokian, Zahira Montalvorekin, eta egitaraua osatzeko, hilekoaren zikloari buruzko tailer bat antolatu dute 9 eta 12 urte bitarteko neskatoentzat martxoaren 29an eta apirilaren 5ean, Emakumeen Etxean, Ione F. Zabaletaren eta Enara I. Dominguezen eskutik.

"Herritar, erakunde eta elkarte guztiak animatu nahi ditugu genero berdintasunaren aldeko misio honetan elkartzera. Guztioi mesede egiten digun berdintasuna da", esan du Berdintasun zinegotziak aurkezpena bukatzeko.

Jarduera batzuk doakoak izango dira eta beste batzuk, aldiz, ordaindu egin beharko dira. Izen-emateak Gasteizko Udalaren webgune bidez egin daitezke.