Tokiko enpresa eta erakundeen ingurumeneko 28 jardunbide egoki izango dira lehian Gasteizko 2026ko Itun Berdea sarietan

Gasteizko Udalak antolatutako Itun Berdea sariek hamargarren edizioa egingo dute azaroaren 26an Europa Biltzar Jauregian, Itun Berdeko enpresen 13. topaketaren baitan, eta tokiko enpresen eta erakundeen ingurumeneko 28 jardunbide egoki izango dira lehian.

Bi urtean behin egiten da topaketa eta komunitatea osatzen duten tamaina eta sektore guztietako tokiko 500 erakunde baino gehiago biltzen ditu. Gainera, publiko orokorrak ere parte har dezake, Gasteizko Udaletik jakinarazi dutenez.

Horrela, tokiko erakunde eta enpresen 28 jardunbide egoki lehiatuko dira hamargarren edizioan saria eskuratzeko. 2025ean eta 2026an Gasteizen egindako esperientzia eta ekintza korporatibo nabarmenenak sarituko dira, hiru kategoriatan: Mikroenpresa, Enpresa Txikia eta Enpresa Ertaina eta Handia. Sari bakoitzak 2.000 euroko diru ekarpena izango du.

Horrez gain, diru ekarpenik gabeko sari bat ere emango da: Ohorezko Saria. Sari horretara aurkeztu ahal izango dira Gasteiztik kanpo dauden Itun Berdearen Komunitateko enpresak, eta, Gasteizkoak izan ala ez, sozietate publikoak eta zuzenbide publikoko erakundeak, eta irabazi asmorik gabeko erakundeak eta elkarte nahiz lanbide jarduerak egiten dituzten erakundeak.

"Itun Berdea sariekin, Gasteizko Udalak aitortu nahi du komunitate hori osatzen duten erakundeek konpromisoa dutela ingurumenean duten inpaktua murrizteko eta gure hirian ekonomia zirkularragoa bultzatzen laguntzeko. Izugarri baloratzen ditugu energiaren kudeaketan, hondakinen kudeaketan, baliabideen optimizazioan eta ekodiseinuan egiten dituzten ekintzak, besteak beste, eta ahalegin hori aitortu nahi dugu", azaldu du Gasteizko Ekonomia Sustapen, Enplegu, Merkataritza eta Turismoko zinegotzi Maria Nanclaresek.

ITUN BERDEA

Itun Berdea udal ekimena Gasteiz 2012ko Europako Hiriburu Berdea jarduera programaren barruan sortu zen eta aitzindaria izan zen Europan. Ordutik, hainbat sektoretako 500 tokiko enpresak baino gehiagok egin dute bat proiektuarekin.