Azkoitiko Batzokiak egitarau zabala antolatu du egoitzaren eraberritzearen urteurrena ospatzeko

Actualizado hace 5 minutos

Azkoitiko Batzokiak urtebete bete du eraberritze lanak amaitu eta ateak berriz zabaldu zituenetik, eta hori ospatzeko egitarau berezia prestatu du datozen egun eta asteetarako.

1907an sortua, egoitza 1981etik Julio Urkixo kalean kokatzen da, eta iaz erabat berrituta inauguratu zuten, apirilaren 25ean.

Eugenio Ibarzabal eta Juan Ajuriaguerra

Urtemuga dela eta, ekitaldi sorta apirilaren 23an hasiko da, ostegunez.

Batzokixen Berriketan egitasmoaren barruan, Eugenio Ibarzabal Aramberri ekonomialari, kazetari eta idazlea izango da gonbidatua. Solasaldia 18.30ean hasiko da, eta bertan bere lan ezagunenetako baten inguruan jardungo du: "Juan Ajuriaguerra. El Hermano Mayor".

Ibilbide oparoa

Hitzaldian, Juan Ajuriaguerraren bizitza eta ibilbidea aztertuko ditu, Gerra Zibiletik 1978ra arte, Euzko Alderdi Jeltzalearen erreferente nagusietako bat izan zenaren ikuspegitik, Eusko Jaurlaritzaren 90. urteurrenaren testuinguruan.

Ibarzabalek ibilbide oparoa izan du kazetaritzan eta administrazioan. Besteak beste, Deia egunkariko erredaktore buru izan zen, Muga aldizkaria sortu zuen 1979an, eta Jose Antonio Ardanza lehendakari izan zen garaian, Jaurlaritzako idazkari nagusi eta bozeramaile karguak bete zituen.

Herri kirolak eta dastaketak larunbatean

Asteburuan izango dira ospakizun nagusiak. Larunbatean, apirilaren 26an, Batzokixen Euskal Jaia egingo dute. Eguerdiko 12.00etan hasita, aizkolarien eta harrijasotzaileen erakustaldiak izango dira, Eneko Otaño eta Ugaitz Mugerza aizkolariekin, eta Guzta eta Goenatxo harrijasotzaileekin.

Ondoren, 13.15ean, urdaiazpiko dastaketa egingo dute, euskal kantuez girotuta.

Egiko gazteak

Ospakizunek ez dute asteburuan amaituko. Maiatzaren 2an, Joseba Díez Antxustegi, Eusko Legebiltzarrean EAJren bozeramailea, Azkoitian izango da EGIko gazteekin batera.

Jardunaldian parte hartuko du, halaber, Maialen Gurrutxaga Elgoibarko alkateak.

Egunari amaiera emateko, bazkaria eta musika izango dira.

Maribel Vaquero

Bestalde, ekainaren 4an egingo dute uda aurreko azken Batzokixen Berriketan saioa, eta bertan hizlari izango da Maribel Vaquero, Espainiako Kongresuan EAJren bozeramailea.