Azkoitiak omenaldia egin zion “Montte” dultzaineroari, herri-musikari egindako ekarpena aitortzeko

Manuel Sudupe Epeldek, Montte izenez ezagunak, omenaldi hunkigarria jaso zuen asteburuan Azkoitian, herri-musikari egindako ekarpenagatik eta dultzaina jotzen egindako ibilbide luzeagatik.

Dultzaina Joleen Topaketa

Omenaldia Dultzaina Joleen Azkoitiko V. Topaketaren barruan egin zuten.

Eguneko hitzorduan Garesko Zubi Ondo gaiteroak, Debako gaiteroak, Hernaniko Dultzaineroak, Itziarko Koadrila, Tolosako Dultzaineroak, Xirolarrua Taldea eta Azkoitiko Dultzaineroak elkartu ziren.

Omenaldian Pello Larrañagak, Txalkor Txistulari Taldekokideak, hitza hartu zuen, Montteren ibilbidea gogora ekarri eta musikariari aitortza egiteko.

Udalaren aitortza

Aitortzarekin bat egin zuen Udalak, eta Ana Azkoitia alkateak oroigarria eman zion musikariari, “dultzaina eta herria hauspotzeagatik” eskerrak emateko.

Azkoitiak bertako kultura eta musika tradizioa babestearen garrantzia ere azpimarratu zuen Ana Azkoitia.

Alkatearen hitzetan, herriak zortea du dultzaineroak, txistulariak, danbor-joleak, trikitilariak eta pandero-joleak izateagatik, baina hori ez da egun batetik bestera sortzen.

“Zuek, zure belaunaldikoek, erakutsi diguzue bidea, eta legatu sendoa utzi ere bai, orain beste batzuk erreleboa hartu nahi izateko”, esan zuen.

Herri-musikaren maisutzat jo zuen alkateak Montte, eta bereziki nabarmendu zuen urte hauetan guztietan erakutsitako eskuzabaltasuna.

“Plazaz plaza, erromeriaz erromeria, baserriz baserri eta herriz herri… bihotza utzi duzu”, adierazi zion, haren musika herriari egindako opari gisa definituz. “Musika, ezer izatekotan, oparia da jasotzen duenarentzat. Musikariaren, dultzaineroaren, eskuzabaltasuna dago hor. Herriari eman nahia”, gaineratu zuen.

Montte baserrian jatorria

1940an jaio zen Manuel Sudupe Epelde, eta Montte ezizena baserritik datorkio.

Dultzaina eta danborra jotzen aitarengandik, Jose Suduperengandik, eta Jose Mari osabarengandik ikasi zuen.

Oso gazterik hasi zen Santa Eskean koadrilarekin dultzaina jotzen, eta soldaduskan ere instrumentuarekin jarraitu zuen.

Artisau lanak

Hasieran, aitarekin eta osabarekin danborra jotzen aritzen zen, osaba Xantik ezin zuenean.

Gerora, dultzaina jotzen hasi zen, eta osabarekin batera ibili zen hainbat urtez. “Korta”rekin ere aritu zen, hura hil zen arte.

Musikari izateaz gain, instrumentuaren artisau-lana ere ezagutu zuen Monttek.

Izan ere, hainbatetan metalezko zein zurezko dultzainak egin zituen, musika tradizioarekiko zuen lotura eta jakintza belaunaldiz belaunaldi transmititzeko egindako ekarpena osatuz.