Arabako Aldundiak 2,3 milioi euro bideratuko ditu AP-1eko eta AP-68ko bidesarien hobarietara

Arabako Foru Aldundiak hobariak emango dizkie aurten ere AP-68 eta AP-1 bidesaridun autobideak erabili ohi dituzten arabarrei, bidesarion kostua gutxitzeko asmoz, eta 2,3 milioi euro bideratuko ditu.

Foru gobernu kontseiluak astearte honetan onetsi du AP-1ean eta AP-68an diruz lagun daitezkeen zatietako 2025eko bidesari hobarietarako deialdi publikoa, bai eta dagozkien aurrekontu esleipenak ere, 1.386.390 euro lehenengorako eta 908.520 euro bigarrenerako, hain zuzen ere.

Horrela, AP-1 sarritan erabiltzen dutenek 15 euroko tarifa laua ordaintzen jarraitu ahal izango dute Etxebarri Dibinatik Eskoriatzarako bide zatian (hileko gehieneko kostua), eta 75 eurokoa Etxebarri Dibinatik Maltzagarainoko bidaietan, hau da, autobidearen ibilbide osoagatik.

Era berean, AP-68 autobidea sarritan erabiltzen dutenek %60ko hobaria jaso ahal izango dute Zambrana eta Bilboren arteko bide lasterreko bidesarian, BEZa barne, hileko 15 bidaiatik aurrera. Programa hori Laudio-Bilbo bide zatira hedatu zen 2021eko irailaren 1etik aurrera.

Arabat Arabako Bideak foru sozietateak kudeatzen dituen hobari programen onuradun izateko Araban bizi direnek teleordainketako sistema bat eduki beharko dute.

BESTE DATU BATZUK

Bestalde, Gasteizko Udalaren 21 Zabalgunea hirigintza sozietateak auzotarrei zuzendutako bulegoa ireki du Dato kaleko 38 zenbakian, herritarren parte hartzea sustatzeko eta Zabalguneko bizilagunei 'Eko Barruti Ekintzailea' proiektuaren aurrerapenei buruzko informazioa emateko.

"Bulego hau irekitzea urrats garrantzitsua da Gasteizko zabalgunea biziberritzeko bidean. Sustatu egiten du bizilagunen parte hartze aktiboa hiri berroneratzeko prozesuan, eta komunitate izatearen sentimendua indartzen du", azaldu du Borja Rodriguez Hiri Eredu, Hirigintza eta Etxebizitza zinegotziak.