Zabarre piratak festa ekarri du Lezora

Actualizado hace 10 minutos

Zabarre pirata eta Maria Labaienen etorrerarekin hasiera eman zitzaien ostiralean Lezoko mendekoste festen zurrunbiloari. Beroaldiak ez zituen herritarrak etxean geldiarazi, eta pirataz bete zen portua, bikoteari eta haren tripulazioari merezitako harrera egiteko. Adin guztietako herritarrak elkartu ziren ongietorrian, jai giroa lehen unetik piztuz.

Baina, Zabarreren etorreraren zain Perutxo Frantziako erregearen ordezkaria ere zegoen eta urtero legez honek Maria Labaienen sagardoa konfiskatu zuen. Plazan borroka antzeztu ondoren eta frantses soldaduak eta Perutxo atxilotu ostean, Zabarre bere etsaiari sagardoa egun bero horretan banatzea proposatu zion eta gatazka dantza batekin amaitu zen.

Kondairaren eta herri-antzerkiaren arteko kontakizunak portua hartu, eta Lezoko iruditeria kolektiboaren parte bihurtu da denborarekin. Zabarrek eta haren tripulazioak herrira egiten duten iritsiera ez da ohiko ongietorri bat; mendekosteetako giroaren ate-jotzea baizik.

Jaiak igandera arte

Jaietako hiru egunetan, haur, gazte eta helduek izan dute eta izango dute zertaz gozatu. Guztira, 25etik gora ekitaldi eta jarduera jaso dira egitarauan. Lezoko Udalaren eta herriko eragileen elkarlanari esker musika, kale animazioa, antzerkia, haurrentzako ikuskizunak eta ohiko herri-jokoak izango dira egitarauaren ardatzetako batzuk.

Igandean, jaietako azken egunean, goizean goizetik hasiko da mugimendua, 09.30ean eskualdeko dultzaineroekin egingo den dianarekin. Ordubete geroago, Karlos Saldise plazan gazte sortzaileen azoka zabalduko dute, eta aldi berean, Goiko Plazan toka, igela eta bote jokoek hartuko dute lekua.

Eguerdi partean, 11.30ean, Gurutze Santuaren plazan Alaia galtzagorria txotxongilo emanaldia izango da ikusgai, eta 12.30ean erraldoi eta buruhandien kalejirak herriko kaleak girotuko ditu. Arratsaldean, 17.00etan, Gurutze Santuaren plazatik abiatuta, Altxorraren bila izeneko jarduera egingo dute, parte-hartzaileak pirataz mozorrotuta.

Egunari amaiera emateko, 19.00etan Eraitsi SL kale antzerkia eskainiko dute Goiko Plazan, eta 21.30ean zezen-suzkoarekin agurtuko dituzte aurtengo jaiak Gurutze Santuaren plazan. Horrela, tradizioa, herri parte-hartzea eta kale giroa uztartuz, Lezok beste urte batez bizirik mantenduko ditu Mendekosteetako ospakizunak.