Azpeitiko udal ludotekek gaur eman diote hasiera Xalto Xaltuek egitasmoari.
Udalekuei hasiera eman aurretik eta ikasturteari amaiera emateko asmoz, herritar guztiei zuzendutako hainbat ekintza antolatu dituzte ekainaren 8tik 10era bitartean.
Txupinazoa
Egitarauari hasiera gaur arratsaldean eman diote, 17.30ean, Jose Antonio Agirre plazan egindako txupinazoarekin. Hurrengo bi egunetan ere leku berean eta ordutegi berean izango dira jarduerak.
Bihar, ekainaren 9an, bingo saioa egingo dute, eta asteazkenean, ekainaren 10ean, Axpin, Antolin eta Carmelin pailazoen ikuskizunaz gozatzeko aukera izango dute haurrek.
Parte hartzeko gonbidapena
Ludoteketatik herritar guztiak gonbidatu dituzte antolatutako ekintzetan parte hartzera.
Era berean, gogorarazi dute jarduerak egiten diren bitartean haurrak gurasoen edo tutoreen ardurapean egongo direla, eta ez ludoteketako hezitzaileen zaintzapean.
Gaztelekuan ere
Bestalde, Gaztelekuan ere ikasturte amaierako egitarau berezia prestatu dute. Asteartean, ekainaren 9an, Iago Magoren ikuskizuna izango dute gazteek; asteazkenean, ekainaren 10ean, ping-pong txapelketa egingo dute; eta ostegunean, ekainaren 11n, bazkari eta bingo musikatuarekin emango diote amaiera ikasturteari.
Jarduera horietan parte hartu nahi duten gazteek aurrez izena eman beharko dute Gaztelekuan bertan.
Ikasturte amaierako ospakizunen baitan, ludoteketako haurrek aste honetan hainbat ekintza berezi egin dituzte dagoeneko, besteak beste, mendi irteerak eta hondartzara joateko txangoak.