Tenerife udaberrian

Actualizado hace 8 minutos

Denek ez dute urteko edozein garaitan oporrak hartzeko aukerarik. Udaberrian, askorentzat lehentasuna uda iritsi arte itxarotea izaten da, ahalik eta egun gehien elkartu ahal izateko eta, aldi berean, uda ondorenerako egun batzuk gordetzeko. Hala ere, udaberria bidaiatzeko sasoirik aproposenetako bat bihurtu da, batez ere prezioengatik eta eguraldiagatik. Garai honetan, beroa hasten da, baina itogarria izan gabe, batez ere helmuga egokia aukeratzen badugu. Gainera, laneko errutinaren nekea pilatzen hasten da, eta deskonexiorako egun batzuk libre hartzea sendagairik onena bihurtzen da.

Testuinguru horretan, Tenerife helmuga ezin hobea bihurtu da. Kanariar Uharteak beti lotzen ditugu eguzkiarekin eta udarekin, hondartzan egun batzuk pasatzearekin… Eta udaberrian Tenerifera bidaiatzeak ez du kontrakoa esan nahi. Esperientzia antzekoa izan daiteke: klima atsegina, uharteko hondartza ugariez gozatzeko aukera… Baina, gainera, baldintza ezin hobeak eskaintzen ditu normalean gutxiago ezagutzen den Tenerifeko zonalde (eta alderdi) bat ezagutzeko: iparraldea. Basoak, mendiak, sumendiak eta bisitatzea merezi duten paisaia amaigabeak.

Urteko edozein garaitan, Tenerifen badira ezinbesteko hainbat gauza: bainujantzia, uhartean mugitzeko auto bat eta presarik gabe ibiltzeko gogoa. Hala ere, udaberrian beharrezkoak bihurtzen dira baita oinetako eroso batzuk, motxila bat eta egun bakarrean hainbat plan lasaitasunez gozatzeko gogoa ere.

Hegoaldea eta iparraldea, bi uharte ezberdin

Tenerifeko hegoaldeak edonork uharteaz pentsatzean irudikatzen duena betetzen du: hondartzak, harea argia, pasealeku amaigabeak eta eguzkipean egiteko ur-kirol eta aisialdi eskaintza amaigabea. Azken finean, ia urte osoan eguzkia bermatuta duen helmuga da. Klima da bertako giroaren baldintzatzailerik handiena: turismoari eta oporrei begira dagoen eremua da, deskonektatzeko pentsatuta. Hala ere, udaberrian bisitatzeak Tenerifeko hegoaldea eta bere eskaintza aparta ezagutzeko aukera ematen du, ingurua jendez gainezka egon gabe.

Tenerifeko iparraldea eta hegoaldea oso ezberdinak dira Marina Iturri

Leku guztietan bezala, uhartearen erdigune deitu genezakeen horretan iparraldearen eta hegoaldearen arteko desberdintasunak lausotzen hasten dira. Bertan dago uharteko ikuskizunik ikusgarrienetako bat: Los Gigantes. Tenerife mendebaldeko muturrean dagoen labar multzo ikusgarria da, milioika urte lehenago basaltozko laba-jarioek sortutako formazio bolkanikoa. Bere horma erraldoiak Atlantikora bertikalean erortzen dira, 600 metroko altuerara iritsiz. Haietaz gozatzeko modurik errazena ingurua bisitatzea eta paisaia mirestea bada ere, itsasontzizko ibilaldiak egiteko aukera ere badago, itsasotik ikuspegi ikusgarriagoa izateko. Gainera, errepidearen ondoan dagoen Archipenque begiratokitik panoramika zoragarria ikus daiteke. Los Guíos hondartza eta Charco de Isla Cangrejo dira labarrak ikusi ondoren bisitatzeko lekurik aproposenetako bi; izan ere, tokiko izaera bolkanikoa mantentzen dute eta uretan atseden hartzeko edo paisaiaren handitasunaz gozatzeko aukera eskaintzen dute.

Los Gigantes interes handiko herria bada ere, hegoaldean badaude interesgune nagusia hondartzak eta paisaiak dituzten beste hainbat toki ere. Horren adibide da La Tejita hondartza, lasaitzeko eta, guztiz birjina ez izan arren, hala dirudien hondartza batez gozatzeko leku aproposa. Handik Montaña Amarilla ikus daiteke, uhartearen hegoaldean dagoen paisaia babestua. Hondartza zuzenean lotuta dago mendi-ibilia egiteko guneekin; beraz, Montaña Amarillara iristea ez da zaila. Inguruko bi herri aipagarri dira El Médano eta Los Abrigos; kostaldeko eta arrantzale giroko herriak dira, Tenerifeko hegoaldeko beste toki batzuk baino tokikoagoak eta turismo maila gutxiagokoak, nahiz eta eremu berean egon.

Costa Adeje Tenerifeko hegoaldeko gunerik ezagunenetako bat da, eta udaberrian bere unerik atseginetako bat bizi du. Klima epel eta egonkorrari esker, hondartzez, pasealekuez eta itsaso ondoko giro lasaiaz gozatzeko aukera ematen du, uda garaiko jendetza handirik gabe. Gainera, atseden plana eta inguruko paisaia bolkanikoa edo itsaslabarrak ezagutzeko aukera uztartzen ditu.

Uhartearen alderik naturalena

Tenerifeko hegoaldea eguzkiaren, hondartzen eta turismo giroaren sinonimo bihurtu bada urteekin, iparraldeak uhartearen aurpegi lasaiagoa eta autentikoagoa erakusten du. Kilometro gutxitan paisaia guztiz aldatzen da: klima freskoagoa bihurtzen da, lainoak ohikoagoak dira eta landarediak dena estaltzen du. Hegoaldeko giro lehorraren eta eguzkitsuaren aldean, iparraldean basoak, mendiak eta itsaslabar berdeak dira nagusi. Udaberrian, gainera, kontraste hori inoiz baino nabarmenagoa da.

Tenerifeko iparraldea eta hegoaldea oso ezberdinak dira Marina Iturri

Anaga aldaketa horren adibiderik ikusgarriena da. Bide estuak, baso lainotsuak eta itsasora jaisten diren mendi handiak aurki daitezke bertan, ia paisaia tropikal baten sentsazioa sortuz. Hala ere, iparraldeko xarma ez dago soilik naturan; herrietan eta giroan ere antzematen da. Turismo masiboaren ordez, tokiko bizitza da protagonista. Kaleetan lasaitasuna dago, taberna txikietan bertako jendea elkartzen da eta eguneroko erritmoa motelagoa da.

Horren adibide dira “guachinche”-ak, Tenerifeko kulturaren elementurik berezienetako bat. Hasieran nekazariek euren ardoa saltzeko irekitako lokal xumeak ziren, baina gaur egun tokiko gastronomia ezagutzeko lekurik onenetako batzuk dira. Etxeko janaria, ardo propioa eta familia giroa eskaintzen dituzte, luxurik gabe baina benetakotasun handiarekin.

Iparraldeko herrien artean, Garachico da berezienetako bat. Sumendi-erupzio batek markatutako herria da, harrizko kaleekin, ozeanoari begira dauden plazekin eta laba gainean sortutako igerileku naturalekin. Lasaitasuna eta itsasoaren indarra uztartzen dituen tokia da. Bestalde, La Orotava herriak Tenerifeko alde historiko eta kolonialena erakusten du: egurrezko balkoi tradizionalak, aldapa handiko kaleak eta Teidera begirako ikuspegi ikusgarriak. Badaude, gainera, askoz txikiagoak diren herriak ere, adibidez, Bocacangrejo bezalako kostaldeko txokoak. Koloretako etxeengatik eta itsasoarekiko lotura estuagatik ezaguna da herria.

Nahiz eta geografikoki erdigunetik gertuago egon, Masca ere ezinbesteko geldialdia da uhartearen alderik naturalena ezagutzeko. Arroila handien artean kokatutako herrixka txiki honek Tenerifeko paisaiarik ikusgarrienetako batzuk eskaintzen ditu, eta bertara iristeko errepide bihurgunetsuak esperientziaren parte dira.

Hondartzek ere alde handia erakusten dute hegoaldearekin alderatuta. Hegoaldean hondartzak zabalagoak, eguzkitsuagoak eta zerbitzuz beteak diren bitartean, iparraldean basatiagoak eta naturalagoak dira askotan. Benijo bezalako hondartzek sumendi-jatorriko harea beltza, olatu handiak eta paisaia dramatikoak dituzte. Ez dira beti bainatzeko aproposenak, baina bat uhartearen izaera naturalena ulertzeko.

Horregatik, Tenerifeko iparraldea ez da hondartzatik haragoko osagarri bat bakarrik; uhartea ulertzeko beste modu bat da. Hegoaldeak eguzkia eta atseden erraza eskaintzen baditu, iparraldeak paisaiak, lasaitasuna eta tokiko bizitzarekin konektatzeko aukera ematen ditu. Eta udaberrian, bi mundu horiek egun bakarrean bizitzeko aukera dago.

Disfrutatzeko aholkuak

Tenerife uharte handia da, eta mapan distantziak laburrak diruditen arren, leku batetik bestera joateak denbora gehiago eskatzen du askotan. Horregatik, aholkurik garrantzitsuena plan gehiegi ez egitea da. Uhartea egun bakarrean “ikusi” nahi izateak kontrako efektua izan dezake: autoan denbora gehiegi pasatzea eta tokiez benetan ez gozatzea. Tenerifen garrantzitsuena ez da kilometroak egitea, leku bakoitza lasaitasunez bizitzea baizik.

Autoa ia ezinbestekoa da uhartea ezagutzeko, batez ere iparraldeko herriak, mendialdeak edo hondartza ezkutuagoak bisitatu nahi badira. Garraio publikoak toki nagusiak lotzen baditu ere, askatasun handiena autoak eskaintzen du. Hala ere, kontuan hartu behar da errepide batzuk estuak, bihurgunetsuak eta aldapa handikoak direla, bereziki Masca inguruan edo mendialdeko guneetan. Horregatik gomendagarria da presarik gabe gidatzea eta iluntzea baino lehen helmugara iristea.

Bestalde, hondartzarik ikusgarrienak ez dira beti irisgarrienak. Sarritan, oinezko bide txikiak edo malda handiak jaitsi behar dira iristeko. Horregatik, oinetako erosoak eramatea ia derrigorrezkoa da, baita ura, eguzkirako krema eta motxila txiki bat ere. Udaberrian eguraldia oso aldakorra izan daitekeenez, komeni da jertse edo jaka arin bat eramatea ere: goizean hondartzan bero egin dezake, baina arratsaldean mendian freskatu ahal du. Azkenik, Tenerifen planik onenak askotan ustekabean sortzen dira; herri txiki batean gelditzea, guachinche batean bazkaltzea edo bidean agertzen den begiratoki batean ilunabarra ikustea.