Lagun Onak mendi bazkuna antolakuntzapean egingo den Udaberriko Mendi Asteak gaur, asteartea, irekiko ditu ateak Azpeitian.
Hiru saio
Hiru egunetan, mendizaletasunaren eta eskaladaren munduko erreferenteak izango dira protagonista: Josu Merino, Iker Pou eta Eneko Pou anaiak, eta Mikel Lizarralde Asurmendi.
Hitzaldi guztiak doakoak izango dira.
Josu Merino
Lehen hitzordua gaur, asteartea, izango da, 19.00etan, Azpeitiko Mendietxe Museoa-n.
Bertan, Josu Merino eskalatzaile elgoibartarrak "Nire mugen gainetik" izeneko hitzaldia eskainiko du.
Munduko bazter askotako hormak eskalatu ondoren, azken urteotan bere muga pertsonalak gainditzeko bizi izan dituen esperientziak partekatuko ditu.
Pou anaiak
Bihar, asteazkena, izango da bigarren saioa. Iker Pou eta Eneko Pou anaiek hartuko dute Merinoren lekukoa, 19.00etan, Azpeitiko Soreasu Antzokian.
Azken urteotan naturako elementu ezberdinei aurre eginez egin dituzten eskalada erronkak azalduko dituzte, muturreko abenturetan oinarritutako kontakizun ikusgarria eskainiz.
Mikel Lizarralde eta esklerosia
Udaberriko Mendi Astea ostegunean amaituko da, berriro ere Mendietxe Museoan, 19.00etan.
Orduan izango da Mikel Lizarralde Asurmendi eibartarraren txanda.
Duela zortzi urte esklerosi anizkoitza diagnostikatu zioten arren, gaixotasunak ez dio mendiarekiko lotura eten.
Lizarraldek "Zazpi" dokumentala aurkeztuko du. Bertan Euskal Herria alderik alde zeharkatu eta zazpi lurraldeetako tontorrik garaienetara igotzeko erronka jasotzen duen proiektua.
Ibilbidea Pagomakurren hasi eta Hiru Erregeen Mahaian amaitu zuen, 300 kilometro baino gehiagoko zeharkaldian.