Bizkaia

Markina-Xemeingo merkataritzak tonbola berezi bat jarri du martxan

Azaroaren 16tik 30era bitartean herriko dendetan erosten dutenek txartelak eskuratu ahal izango dituzte deskontuak eta bertako produktuak irabazteko
Azaroaren 30era arte egongo da martxan kanpaina berria
Azaroaren 30era arte egongo da martxan kanpaina berria / E. Salterain

Markina-Xemeingo Hemen Be Bai merkatari elkarteak 'Tonbola 2026' kanpaina abiatu du herriko saltokietan kontsumoa sustatzeko eta bertako merkataritza bizirik mantentzeko helburuarekin. Ekimen honen bitartez, azaroaren 16tik 30era bitartean —edo txartelak amaitu arte— herriko dendetan erosketak egiten dituzten 18 urtetik gorako herritarrek zortea probatu ahal izango dute Arraspatu eta irabazi! leloaren pean.

Kanpainaren funtzionamenduari dagokionez, parte hartzen duten saltokietan erosketak egitean tonbolako txartelak banatuko dira bezeroen artean. Txartel horiek arraspatuta, herritarrek sari zuzenak eskuratzeko aukera izango dute, zehazki, herriko dendek beraiek eskainitako deskontuak zein askotariko produktuak.

Sariak trukatzeko baldintzei dagokienez, antolatzaileek bi data garrantzitsu zehaztu dituzte. Alde batetik, deskontu-txartelak egokitzen zaizkien bezeroek saltoki berean egin beharreko hurrengo erosketan erabili beharko dituzte, abenduaren 14a baino lehen.

Bestetik, herriko saltokietako produktuak egokitzen zaizkien saridunek abenduaren 3an jasoko dituzte beren opariak. Banaketa ekitaldi berezi baten barruan egingo da: egun horretan ospatuko den Piztu dendak ekitaldian, hain zuzen ere, arratsaldeko 20.15ean udaletxe aurrean.

Ekimen honekin, Markina-Xemeingo merkatari elkarteak tokiko merkataritzaren aldeko apustua egiteko deia luzatu die herritarrei, erosketak herrian bertan egiteak dituen onurak azpimarratuz.

2026-11-18T17:49:10+01:00
En directo
Onda Vasca En Directo