Antzinako musikaren doinuak, organo hots maiestatetsuak eta Erdi Aroko soinu bereziak berriro entzungo dira Ziortzan irailaren 12tik 20ra bitartean. Urteroko hitzordu bilakatuta, aurtengo edizioak maila goreneko nazioarteko zein bertoko bakarlari, talde eta abesbatzak bilduko ditu herriko tenpluan, ondare arkitektonikoa eta musikalaren uztartze paregabea eskainiz herritarrei.
Musika zikloa bihar, irailaren 12an, bertan abiatuko da, arratsaldeko 18.00etan, La Ritirata talde ezaguna eta Josetxu Obregonen biolontxelo jolearen eskutik. Hurrengo egunean, irailaren 13an, egitarau bikoitza izango da: eguerdiko 13.00etan organo kontzertu bikain batez gozatzeko aukera egongo da Rui Soarez eta Juan Jose Monteroren interpretazioarekin; arratsaldeko 18.00etan, berriz, Propitia Sydera Orkestra Barrokoak hartuko du agertokia, Roberta Invernizzi soprano argitsuarekin eta Pedro Gandia Martin biolin jotzailearekin batera.
Bigarren asteburuan ere musika eskaintzak ez du etenik izango. Irailaren 19an, arratsaldeko 18.00etan, Propitia Sydera Orkestra Barrokoak berriro igoko da oholtza gainera, baina kasu honetan Leioako San Juan Bautista Abesbatzaren kalitatezko ahotsak elkartuko zaizkio, Jon Malaxetxebarriaren zuzendaritzapean.
Amaitzeko, irailaren 20an, bi saio berezik emango diote amaiera edizio honi. Eguerdiko 13.00etan organo kontzertua eskainiko dute Bart Coppé Erdi Aroko tronpeta jotzaileak eta Jan Vermeire organistak. Arratsaldeko 18.00etan, azkenik, Artefactum taldeak Erdi Aroko musika doinu liluragarriekin itxiko du zikloa, ikusleak beste garai batzuetara eramanez. Entzunaldietarako sarrera doakoa izango da lekuak bete arte.
Aipatzekoa da jendeak parte har dezan, autobus bat prestatu da Elkano kaleko 5. zenbakiko atarian (Txabarri jauregiaren aurreko autobus-geltokia), Bilbo-Ziortza joan-etorria egiteko.