HemenGuk sareak beste urrats bat eman du Oiartzungo herriko produktuen kontsumoa sustatzeko. Orain arte hiru hilean behin larunbatetan egiten ziren azokekin batera, hemendik aurrera herriko ekoizleen produktuak astero erosteko aukera izango dute herritarrek. Astelehenero izango da hitzordua, Kontzejupean, 17.30etik 18.30era.
Eskaintza berrian herrian bertan ekoitzitako hainbat elikagai izango dira eskuragarri: arrautzak, eztia, gazta, pasta, ogia, sagardoa eta barazki-saskiak. Azken horiek Arraztalo kontsumo taldeko bazkideek eskainiko dituzte. Garaian garaiko produktuak ere gehituko zaizkio eskaintzari, ekoizpenaren eta urte-sasoiaren arabera.
Horrela, HemenGuk azokak maiztasun handiagoa izango du eta herritarrek aukera izango dute tokiko produktuak zuzenean ekoizleei erosteko, ohiko hiru hilean behingo azokaren zain egon beharrik gabe. Ekimenak, gainera, tokiko ekoizleen eta kontsumitzaileen arteko harreman zuzena indartu nahi du.
Bertako produktuak balioan jartzea
HemenGuk Oiartzungo ekoizleen sarea da eta 2021ean sortu zuen Udalak, herriko ekoizleekin elkarlanean. Ekimenaren helburu nagusien artean daude bertako produktuak balioan jartzea, herritarrak tokiko elikagaiak kontsumitzearen garrantziaz kontzientziatzea eta ekoizleen eta herritarren arteko zuzeneko harremana sustatzea.
Azken urteotan, HemenGuk azokek tokiko ekoizpenaren erakusleiho gisa funtzionatu dute Oiartzunen. Larunbatetako azoketan hainbat elikagai eta artisautza-produktu aurkitu ahal dira: barazkiak, arrautzak, eztia, gazta, ogia, sagardoa, pasta, garagardoa, ahatekiak, kombucha eta bestelako produktuak, besteak beste eta herriko ekoizle eta artisauen parte-hartzea nabarmena izaten da.
Elikadura burujabetza
Tokiko ekoizpena sustatzeko estrategia zabalago baten barruan kokatzen da ekimena. Oiartzungo Udalak elikadura-burujabetza helburu estrategikotzat jo izan du eta, azken urteotan, herrian bertan ekoitzi eta kontsumitzen den elikagai kopurua handitzeko hainbat proiektu jarri ditu martxan. Horien artean, HemenGuk marka bera eta bertako produktuen zuzeneko salmenta sustatzeko azokak daude.
Udalak, gainera, herriko elikadura-establezimenduetan bertako produktuak identifikatzeko HemenGuk marka erabiltzeko ekimena ere jarri zuen martxan. Helburua herritarrek errazago jakitea zein diren Oiartzunen ekoitzitako produktuak eta, horrenbestez, tokiko kontsumoa bultzatzea izan da.
Bestalde, HemenGuk azokek dagoeneko tokia egin dute Oiartzungo ekitaldi eta jai-egutegian. Xanistebanetan, esaterako, Baserritar Egunean herriko eta garaiko produktuen azoka antolatu izan da, HemenGuk sarearen eskutik.
Asteleheneroko hitzordu berriak, beraz, ohiko azokaren eskaintza osatuko du, tokiko elikadura-sarea indartzeko eta herrian bertan ekoitzitakoa herritarren eguneroko erosketetara hurbiltzeko. Horrela, hiru hilean behingo azokaz gain, Oiartzungo produktuak erosteko asteko hitzordu egonkorra izango dute hemendik aurrera herritarrek.