Gasteizko Udalak asteburuan estreinatu du San Martingo parkeko haurrentzako jolaserako eta aire zabalean kirola egiteko gune berritua, Espazio Publikoaren eta Auzoen Sailak bultzatutako hobekuntza lanak amaitu ondoren. Jarduketak 217.938 euroko inbertsioa eskatu du, eta parkeko espazio jendetsuenetako bat eraldatzea ahalbidetu du. Gasteizko Udaletik jakinarazi dutenez, zoladura berritzea, jolasguneak berrantolatzea eta ekipamendu berriak instalatzea sartu dira esku hartzean.
Berrikuntza nagusien artean, zurezko egitura handi bat nabarmentzen da, hainbat altuerakoa, igotzeko, oreka mantentzeko eta irristatzeko jarduerekin, haurrek jolas modu desberdinez goza dezaten pentsatua. Gainera, aire zabalean kirola egiteko gunea egokitu da, bizikleta estatikoarekin, eliptikoarekin eta beste elementu batzuekin, adin desberdinetan jarduera fisikoa errazteko. Ping-pong mahaiak ere zaharberritu dira, eta egoteko espazio berriak prestatu dira, mahaiekin eta bankuekin.
Bestalde, Eusko Jaurlaritzako Elikadura, Landa Garapen, Nekazaritza eta Arrantza Sailak Euskal Autonomia Erkidegoko (EAE) landa eremua eta itsasertza dinamizatzen lagunduko duten gizarte ekitaldiak antolatzeko 2026ko laguntzen deialdia egin du, 200.000 euroko aurrekontuarekin.
Jarduera bakoitzeko 15.000 euro arteko diru laguntzak banatuko ditu, betiere jardueraren kostu osoaren %60 gainditu gabe. Jaurlaritzaren arabera, laguntzen helburua landa eta itsasertzeko eremuetan gizarte jarduerak antolatzea sustatzea da, eremuotako dinamizazio ekonomiko eta sozialari, nortasunaren eta kultura-ondarearen kontserbazioari eta bertako jarduerari eusten laguntzeko.
Deialdian jasotako landa eremuetan eta itsasertzeko eremuetan ekitaldiak sustatzen dituzten pertsona fisiko eta juridikoek jaso ahal izango dituzte diru laguntzak, publikoek zein pribatuek. Jarduerak 2026an egin beharko dira 5.000 biztanle arteko udalerrietan, oinarri arautzaileetan ezarritako eremuetan.