Arabako Foru Aldundiko gobernu kontseiluak 2026ko ikus-entzunezkoen sorkuntzarako laguntzen deialdiaren ebazpena onetsi du, Ekonomia Garapenaren eta Jasangarritasunaren Sailak proposatuta, eta guztira 340.990 euro bideratuko ditu zinema eta ikus-entzunezkoen industriarekin lotutako 22 proiektu sustatzera.
Foru erakundearen arabera, diru laguntza ildoaren helburua da Araban ikus-entzunezkoen jarduera garatzen laguntzea, sektoreko enpresei eta profesionalei babesa ematea eta lurraldean jarduera ekonomikoa, enplegua eta aukera berriak sortzeko gaitasuna duen sormen industria sendotzea.
Deialdiak bost laguntza modalitate ditu, sormen prozesuaren hainbat fase hartzen dituztenak: gidoien idazketa, proiektuen garapena eta film luzeen, dokumentalen, film laburren eta telesailen ekoizpena. Diru kopururik handiena film laburren ekoizpenera bideratuko da: 120.000 euro, zazpi proiekturen artean banatuta.
Bestalde, zinema, plataforma digital eta telebistarako proiektuen garapenak 110.990 euro jasoko ditu, zortzi ekimen laguntzeko. Film luzeen eta sormen dokumentalen ekoizpenerako laguntza 50.000 eurokoak izango da, bi proiekturentzat, eta telesailen ekoizpenak 20.000 euro jasoko ditu, proiektu bakar baterako. Azkenik, gidoien idazketarako modalitateak lau proiektu lagunduko ditu, guztira 40.000 eurorekin.
Laguntzen onuradunen artean daude, besteak beste, 'Txakur bati koska', 'Horma', 'Zur eta lur', 'Hermanos Pou, la cuerda invisible', 'Estoucha', 'La Torre de los suicidios', 'Sehaska garaiak', 'Ganado perdido' eta 'Xare' proiektuak.
Proiektuen hautaketa lehia bidezko prozedura baten bitartez egin da. Bertan, proiektuen kalitate artistikoa eta profesionala, originaltasuna, bideragarritasun ekonomikoa eta eragin sozioekonomikoa baloratu dira, besteak beste. Onetsitako laguntzek ekoizpen berriak abian jartzen lagunduko dute, baita sormenaren eta garapenaren hasierako faseak sustatzen ere, "funtsezkoak" baitira ikus-entzunezkoen ekimenek aurrera egin dezaten eta finantzaketa zein banaketa aukera berriak aurki ditzaten.