Arabako Foru Aldundiko Natura Ondarearen Zerbitzuak jarduera programa berria antolatu du uda hasierarako Aizkorri-Aratz, Valderejo, Gorbeia eta Izki parke naturaletan. Programazioak publiko guztiei zuzendutako proposamenak biltzen ditu, natura, astronomia, biodibertsitatea eta ingurune naturalari lotutako tradizioak herritarrei hurbiltzeko helburuarekin, jarduera parte hartzaileen eta ingurumen sentsibilizaziokoen bidez.
Foru erakundeak jakinarazi duenez, Aizkorri-Aratz parke naturalean ingurune naturalaren eta jakintza tradizionalen ezagutzarekin lotutako bi jarduera egingo dira. Ekainaren 6an, 'Hegaztien kontzertua' egingo da Araiako parketxean, inguruko hegaztien kantuak identifikatzen ikasteko. Jarduerak espezie arruntenei buruzko sarrera labur bat eta ibilbide gidatu bat uztartuko ditu, naturan bertan dituzten soinuak ezagutzeko.
Ondoren, ekainaren 20an, sendabelarren tailer bat egingo da, santio belar ukendu tradizionala egiteko. Ibilbide gidatu baten bidez, parte hartzaileek hainbat sendabelar ezagutzen ikasiko dute, haien propietateak eta erabilera tradizionalak ezagutuko dituzte, eta ukendu hori egingo dute, jardueran bildutako landareak erabiliz.
Bestalde, Izkiko parke naturalak faunarekin eta dibulgazio zientifikoarekin lotutako hainbat proposamen eskainiko ditu. Hala, ekainaren 13an, hegazti harkaiztarrak ezagutzeko ibilbide gidatu bat antolatuko da 12 urtetik gorakoentzat, parkeko horma harritsuetan espezie enblematikoak ikusteko, hala nola sai arrea, sai zuria edo belatz handia. Begiztatzeaz gain, jardueran hegazti horien kontserbazioarekin lotutako gaiak ere jorratuko dira, eta giza inpaktua haien habitatetan gutxitzearen garrantziarekin lotutakoak.
Orobat, ekainaren 21ean, udako solstizioarekin batera, Korresko parketxean eklipseei eta eguzki behaketari buruzko dibulgaziozko hitzaldi bat egingo da. Jarduerari esker, aurtengo eguzki eklipsearen gakoak ezagutu ahal izango dira, eta eguzkia modu seguruan behatu ahal izango da, iragazki espezializatuak dituzten teleskopioen bidez.
Valderejoko Parke Naturalean jarduerak ekainaren 6an hasiko dira, gaueko tximeletei eskainitako ekintza batekin. Intsektu horiek erakartzeko argi fokuak erabiliko dira eta parte hartzaileek parke naturalean dauden espezie horien forma, kolore eta tamaina aniztasuna ezagutu ahal izango dute.
Ekainaren 14an, eguzki mugimenduan, urtaroetan, itzaletan eta eklipseetan oinarritutako eguneko astronomia tailer bat egingo da. Jarduera horretan, eguzkiaren, lurraren eta ilargiaren arteko erlazioari buruzko azalpen praktikoak emango dira, eta eguzki behaketa segurua egingo da teleskopio egokituekin.
GORBEIA
Bestalde, Gorbeiako parke naturalean, ekainaren 27an, santio belar ukendua egiteko jarduera bat egingo da, udako solstizioari lotutako sendabelarrei eta jakintza herrikoiei lotuta. Saioan, santio belarren erabilera tradizionalak azalduko dira, eta herri kulturan errotutako erremedio natural hori eskuz egingo da.
Gainera, uztailaren 18an, aire zabaleko yoga saio bat egingo da naturan. 18 urtetik gorakoei zuzendutako proposamena maila guztietara egokitutako 'vinyasa yoga' izeneko yoga estilo dinamikoko praktika bat izango da, ongizate fisikoa eta ingurune naturalarekiko lotura sustatuz.
Jarduera guztiek aurrez izena ematea eskatzen dute parke natural bakoitzaren web orrien bidez, eta ikaskuntza, parte hartze eta ingurunearen gozamen jasangarrirako gune gisa daude pentsatuta. Programazio honekin, Arabako Foru Aldundiak ingurumen hezkuntzako eta natura ondarearen dibulgazioko ekimenak bultzatzen jarraitzen du, lurraldeko naturagune babestuen ezagutza eta kontserbazioa sustatuz.