Arabako Foru Aldundiko gobernu kontseiluak onartu du 2,5 milioi euroko diru laguntza ematea Gasteizko Udalari, Lurralde Orekaren eta Lurralde Antolamenduaren Sailak proposatuta, gasteiztarrei eta arabar guztiei zerbitzua ematen dieten azpiegitura eta ekipamendu publikoetan inbertsioak finantzatzeko.
Ekarpena bi erakundeen arteko lankidetza hitzarmen baten bidez gauzatuko da, eta 3,1 milioi euroko udal inbertsio programa baten zati bat finantzatzeko erabiliko da, foru erakundeko arduradunek zehaztu dutenez.
Kirol instalazioak, industrialdeak, bizikleta-loturak, garraio publikoko geralekuak eta toki erakunde txikietako azpiegiturak hobetzeko jarduketak jasotzen ditu. Aurreikusitako inbertsioen artean, 1.250.000 euroko lehen multzo bat nabarmentzen da, kirol instalazioak hobetzera bideratua. Multzo horretan Olaranbe, Zaramaga eta Adurtzabal futbol zelaietan eta Gamarrako Errugbi Hirian jarduketak egitea aurreikusi da.
Bigarren multzoak, 1.250.000 eurokoa hori ere, industrialdeetan eta toki erakunde txikietan eraberritze lanak eta asfaltatze integralak egitea jasotzen du. Era berean, Miñaoko Teknologia Parkearekiko bizikleta-lotura egiteko obrak barne hartzen ditu, zehazki, Gamarrako Atariaren eta N-240 errepidearen arte.
Azkenik, programak beste 600.000 euro aurreikusi ditu Alavabusen Gasteizko geralekuak egokitzeko eta toki erakunde txikietan inbertsioak egiteko.
Arabako Aldundiaren eta Gasteizko Udalaren arteko lankidetzaren abiapuntua da hiriburuan kokatutako azpiegitura askok lurraldeko beste udalerri batzuetan bizi diren pertsonei ere zerbitzua ematen dietela. Horixe gertatzen da, besteak beste, kirol, kultura, hezkuntza, osasun, garraio eta aisialdiko instalazioekin. Azpiegitura horien erabilera udalerriko mugetatik harago doa, eta horiek mantentzeak eta hobetzeak ahalegin ekonomikoa eskatzen dio Gasteizko Udalari.