Arabako Foru Aldundiko gobernu kontseiluak klima aldaketaren ondorioen aurrean lurraldeko nekazaritza sektorearen egokitzapena, erresilientzia eta jasangarritasuna indartzeko laguntzen deialdia onetsi du, 1.950.000 euroko aurrekontuarekin. Foru erakundeak aurretik iragarritako neurria da, ustiategiei udan izandako lehortearen eta tenperatura altuen ondorioak arintzen laguntzeko.
Ramiro Gonzalez ahaldun nagusiak azaldu duenez, Nekazaritza Sailak sustatutako deialdia azken hilabeteetako ezohiko baldintza klimatikoen ondorioz beren jarduera kaltetuta ikusi duten nekazaritza eta abeltzaintza ustiategiei zuzenduta dago, bai ekoizpenaren errendimendua murriztu delako, bai ekoizpen kostuak handitu direlako.
Diru laguntzen zenbatekoa ustiatutako azaleraren edo ustiategi bakoitzeko animalia kopuruaren arabera ezarritako moduluen bidez zehaztuko da, baldintza klimatikoek eragindako errendimendu galerak eta kostuen igoera kontuan hartuta.
Nekazaritza laboreen kasuan, laguntzak hektareako 50 eurotik 380 eurora bitartekoak izango dira: 50 euro ekilorearentzat eta 380 euro ereiteko patatarentzat. Era berean, hektareako 225 euro ezarri dira kontsumorako patatarentzat, 210 euro babarrunarentzat, 200 euro azukre-erremolatxarentzat, 75 euro artoarentzat eta 220 euro porruarentzat.
Abeltzaintza ustiategien kasuan, moduluak espeziearen eta ekoizpen orientazioaren arabera ezarri dira. Horrela, laguntzak 60 eurokoak izango dira 24 hilabetetik gorako haragitarako behi bakoitzeko, 36 eurokoak 24 hilabetetik gorako esnetarako behi bakoitzeko eta ezarritako baldintzak betetzen dituzten adin horretatik beherako hazkuntzako bigantxentzat, eta 30 eurokoak 12 hilabetetik gorako haragitarako zaldi-eme bakoitzeko. Ardi eta ahuntz ustiategietan, 6 euro emango dira eme ugaltzaile bakoitzeko, eta erlezaintza ustiategiek 9 euro jaso ahal izango dituzte erlauntz bakoitzeko.
Eskatzaile bakoitzak gehienez 15.000 euro jaso ahal izango ditu, eta ez da 300 eurotik beherako ordainketarik egingo. Laguntzen onuradun izan ahalko dira dagozkien erregistroetan inskribatutako ustiategien titularrak, baldin eta 2026ko Nekazaritza Politika Bateratuaren Eskaera Bakarra Araban aurkeztu badute, egoitza fiskala lurraldean badute eta ezarritako gainerako baldintzak betetzen badituzte.
Eskaerak aurkezteko epea hamar egun baliodunekoa izango da, erabakia Arabako Lurralde Historikoaren Aldizkari Ofizialean argitaratu eta hurrengo egunetik aurrera.