Andoaingo Santa Krutz jaiak, azken txanpan

Santa Krutz jaien azken txanpari begira dago Andoain, eta jaietako egitarau oparoari amaiera emango diote igande honetan, maiatzaren 3an, tradizioa, gastronomia, musika eta herri giroa uztartuko dituen jardunaldi zabalarekin.

Ostegunetik martxan diren ospakizunek, Lebiton konpartsak suziria piztu zuenetik, ehunka lagun bildu dituzte herriko kaleetan, eta jai batzordeak herritarrak animatu ditu azken eguneko hitzorduetan parte hartzera.

Igandean, tradizioa nagusi

Izan ere, igandea izango da egun handia eta egitaraua goizeko 10.00etan hasiko da, Juanita Alkain plazan dultzaineroen doinuekin. Ondoren, 10.30ean, santakrutzetako ekitaldi instituzional eta sinbolikoenetako batzuk egingo dira: banderaren eta udal korporazioaren jaitsiera, eskopeteroen eta txistularien laguntzaz egingo den desfilea, baita banderaren arboltzea eta Ezpata dantza ere Santa Krutz zubian.

Ezpata dantzako entsegu orokorra Aitziber Muga

11.00etan meza nagusia izango da Santa Krutz ermitan, Alberto Agirre abesbatzak kantatua, eta eskopeteroek ere parte hartuko dute. Liturgia amaitzean, 11.30ean, Ezpata dantza eta Brokel dantza eskainiko dira berriz ere zubian, jaietako une ikusgarrienetako batean.

Dastaketa gastronomikoak

Goiz osoan zehar, Maindi iturriaren inguruan artisau azoka eta umeentzako tailerrak izango dira, 15.00ak arte. Era berean, 12.00etan txakolin dastaketa egingo da Kaimuturrean, eta ordurako kaleak girotzen ariko dira Andoaingo trikitilariak Kale Nagusian barrena. Musika eskaintza 13.00etan osatuko da Andoaingo udal musika eskolako bandaren kontzertuarekin.

Ostiraleko haur krossa Aitziber Muga

Arratsaldean ere ez da atsedenik izango. 17.00etan, Zumea plazan, XLV. Sagardo Txapelketa ospatuko da, Andoaingo talogileek prestatutako basataloekin batera. Ordu berean, txikienek baserriko kirol parkeaz gozatu ahal izango dute Kaimuturrean.

Jai amaierako giroa iluntzean indartuko da. 19.00etan plaza dantzak egingo dira Kale Nagusitik abiatuta, eta ordu berean hasiko da taberna arteko pintxo txapelketa ere. Gaueko 21.15ean zezen suzkoak hartuko du protagonismoa, eta 21.30ean iritsiko da santakrutzen amaierako ekitaldi nagusia: danborrada popularra, jaiak ofizialki agurtuko dituen azken hitzordua.

Antolatzaileek herritarrak gonbidatu dituzte jaietako azken eguna “indar bereziz” bizitzera eta amaiera giro onean ematera