Usurbilek martxan jarri du Etxealdiko igogailua

Actualizado hace 6 minutos

Usurbilgo Etxealdiko igogailua dagoeneko martxan da, obrak amaitu ostean. Asteazken arratsaldean estreinatu zuten azpiegitura berria udal ordezkariek eta auzotarrek elkarrekin. Igogailuak 12 metroko desnibela gainditzen du eta Etxealdia Kale Nagusiarekin lotzen du; goiko geralekua Kale Nagusia 10 atariaren parean kokatu dute.

Proiektuak 773.700 euro inguruko inbertsioa izan du, eta horietatik 370.000 euro Eusko Jaurlaritzaren dirulaguntza bidez finantzatu dira. Udalaren arabera, azpiegituraren helburua da herritarren eguneroko mugikortasuna erraztea, bereziki Etxealdiko bizilagunena, irisgarritasuna hobetuz.

Proiektu estrategikoa

Inaugurazioan izan ziren Agurtzane Solaberrieta Mesa alkatea eta Iratxe Begiristain Otegi zinegotzia, auzoko bizilagunekin batera. Egitasmoa aurreko legealditik datorren udalaren eta auzotarren arteko elkarlanaren emaitza da. Orduan, auzoaren beharrak identifikatzeko saioak egin eta Etxealdiko Irisgarritasun Plana osatu zuten; dokumentuan jasotako neurriak lau fasetan gauzatzea adostu zuten.

Igogailua plan horren azken fasean kokatu zen, aurrekontu handia zela eta; hala ere, Eusko Jaurlaritzaren laguntza ekonomikoa lortu ondoren, exekuzioa aurreratzea erabaki zen. Azpiegiturak bi geraleku ditu, eta igogailura iristeko espaloia egokitu eta San Esteban 12 atariarekin modu irisgarrian lotzen duen arrapala ere eraiki dira.

Irisgarritasun Plana

Bestalde, Irisgarritasun Planari lotuta, San Esteban kalea oinezkoentzat egokitzeko lanak ere egin dira, bi fasetan. Goiko zatia 2023an amaitu zen, eta beheko zatiko obrak azken txanpan daude.

Bigarren faseko lanak tren geltoki berriaren obren menpe egon dira; izan ere, ETS-k San Esteban kalea eta geltokia lotzen dituen zubia berritu behar izan du, zubiaren oina igotzearekin batera. Lan horiek amaitu ondoren abiatu ziren kalearen beheko zatia egokitzeko obrak.

San Esteban kalea eta igogailua martxan jarrita, auzoaren beheko zatia egokitzea geratzen da. Jarduketa hori IUPI Irisgarritasun Unibertsaleko Plan Integralean txertatu du Udalak. Plana urtarrileko osoko bilkuran onartu zen hasieraz eta aho batez; Gipuzkoako Aldizkari Ofizialean argitaratu ondoren, jendaurrean jarriko da, interesdunek ekarpenak egin ditzaten. Ekarpenik ez balego, behin betiko onartuta geratuko litzateke.

Aurreikusitako lanen artean daude berdegunea etxebizitzetara hurbiltzea eta aparkalekuak berrantolatzea, oinezkoen segurtasuna eta irisgarritasuna indartzeko. Udalaren esanetan, helburua da Etxealdia auzoa irisgarritasun unibertsalaren irizpideetara egokitzea, auzotarren bizi-kalitatea hobetzeko.