Txakurrek Eraztun Berdean lotuta joan behar dutela gogorarazteko kanpaina abiatu dute Gasteizen

Actualizado hace 6 minutos

Gasteizko Ingurumen Gaietarako Ikastegiak kanpaina bat jarri du martxan herritarrei gogorarazteko txakurrek lotuta joan behar dutela Eraztun Berdean egiten dituzten ibilaldietan. Kanpainan azalduko da zergatik txakurrak aske eramateak kalteak eragin diezaiekeen hiriburuko birika berdeko florari eta faunari.

Kanpainak kartelak, liburuxkak, bideoak eta iragarkiak biltzen ditu, publizitate euskarri desberdinetarako eta sare sozialetako argitalpenetarako. Material horietan gogorarazten da txakurrak naturguneetan lotuta joan behar izatea ez dela soilik gizalegearekin lotutako kontua, 2021ean onartutako Euskadiko Natura Ondarea Kontserbatzeko Legean aurreikusitako araua ere badelako.

Ekimenerako sortutako piezek erakusten dute solte dabiltzan txakurrek fauna nola uxatzen duten erakusten dute. Gainera, habiek eta hegaztiek babesa behar dute, eta zapatzeak landaredia kaltetzen du. Era berean, birsortzen ari diren eremuak bereziki zaindu behar dira, eta laborantza eremuak lanerako tokiak dira, ez jolaserako eremuak.

Borja Rodriguez Gasteizko Udaleko Ingurumeneko zinegotziak azaldu duenez, "Eraztun Berdeak giro ekologikoen aniztasun handia du bere baitan eta horiek, aldi berean, aberastasun naturalistiko esanguratsua gordetzen dute: basoak, ibaiak, hezeguneak, belardiak, heskaiak eta ur bazterrak, eta Olarizuko Lorategi Botanikoa, hainbat landare bildumarekin, leku bukoliko honetan batera bizi diren ekosistema askotarikoen erakusgarri dira".

"Bere kokagune batzuk, hala nola Salburuko hezeguneak eta Zadorra ibaia, nazioartean aitortuak izan dira beren balio ekologiko handiagatik, eta Natura 2000 Sarearen parte dira. Ezinbestekoa da, beraz, horiek zaintzea", gaineratu du.

Maskotek hiriko naturagune pribilegiatu horretaz gozatu ahal izateko, Gasteizko Udalak aisialdirako sei berdegune prestatu ditu: bat Salburun, bi Olarizun, bat Zabalganen, bat Armentian eta bi Zadorra inguruan (Atxa eta Abetxuku).