Tuvisaren 11. linea abiarazteko beharrezko jarduketak amaitzen ari da Gasteizko Udala

Actualizado hace 4 minutos

Gasteizko Udaleko Espazio Publikoaren eta Auzoen Sailak Tuvisaren 11. linea izango denaren geltokiak egokitzeko lanen azken txanpari heldu dio, uztaileko bigarren hamabostaldian martxan jartzeko aurreikuspenarekin, eta espazio publikoa ibilbide berrira egokitzeko beharrezkoak diren jarduketak gauzatu ditu azken asteotan.

Gasteizko Udaletik jakinarazi dutenez, guztira, 20 kokapen berri prestatu dira linearen ibilbidean zehar, eta horietako zazpitan beharrezkoa izan da plataforma berriak eraikitzea irisgarritasuna, segurtasuna eta zerbitzuaren eraginkortasun egokia bermatzeko.

Joan den astean amaitu zituzten zazpi plataforma horiek instalatzeko lanak, Sofia Erreginaren hiribidean, Zabalgana hiribidean, Baiona kalean, Luis Olariaga kalean eta Arabako Unibertsitate Ospitaleko kanpo kontsulten inguruan. Une honetan, geltoki berriak erabat erabilgarri uzteko beharrezkoak diren azken erremateak egiten ari dira.

Egiteke dauden lanen artean, seinaleztapen horizontala, bideko pintaketa lanak, oinezkoentzako pasabideak egokitzea, babes elementuak jartzea eta obrako hesiak kentzea daude, besteak beste. Jarduketa txikiak dira, proiektuaren azken fasea osatzen dutenak, eta aste honetan gauzatzea aurreikusi da.

Lanok amaitu ondoren, 20 kokapen berriak prest izango dira zerbitzua martxan jartzeko. Behin betiko data Tuvisak jakinaraziko du, baina linea uztaileko bigarren hamabostaldian zerbitzuan sartzeko aurreikuspenari eutsi zaio.

Tuviuaren 11. lineak Zabalgana eta Lakua-Arriaga lotuko ditu, hiriko auzoen arteko zeharkako konexioak indartuz eta herritarrentzako mugikortasun jasangarriko alternatibak zabalduz.

Beatriz Artolazabal Espazio Publikoaren eta Auzoen zinegotziak nabarmendu du lanek aurreikusitakoaren arabera egiten dutela aurrera, eta jarduketa horrek hiriko garraio publikoaren sarea hobetzen jarraitzeko duen garrantzia azpimarratu du.

"Linea berria datozen egunetan abian jarri ahal izateko beharrezkoak diren jarduketak amaitzen ari gara. Plataforma berriak eraiki ditugu, irisgarritasuna hobetu dugu eta kokapen guztiak egokitu ditugu, zerbitzua segurtasuneko eta erosotasuneko berme handienekin eman ahal izateko", azaldu du.