Azpeitia Dantzan programaren barruan, Sahatsa dantza taldearen sorreraren 50. urteurrena ospatzeko antolatutako Ezpatadantza saioen hirugarren emanaldia larunbat honetan, uztailaren 11n, izango da Azpeitian.
50. urteurrena
Egitarauak Ezpatadantzaren desfilea eta Gipuzkoako dantzen emanaldia uztartuko ditu.
Taldearen sorreraren 50. urteurrena ospatzeko antolatu dituen emanaldiek Urrestillan izan zuten lehen hitzordua, Zaharren Egunean.
Bigarren saioa Azkoitian egin zuten, San Joan bezperan, eta hirugarrena Azpeitian izango da.
Ezpatadantzariak eta txistulariak
Ekitaldian 55 ezpatadantzarik eta dozena bat txistularik osatutako komitiba arituko da.
Taldea 19.20an abiatuko da Basozabaletik, Herriko Plazara joateko eta udaletxetik herriko bandera jasotzeko.
Handik Eliz Kaletik San Sebastian de Soreasu parrokiaren plazara iritsiko dira; bertan Ezpatadantza eta Bandera Dantza eskainiko dituzte.
Bukaera, herriko plazan
Ondoren, Erdikaletik gora Herriko Plazara joango dira Sahatsa taldeko kideak, 20.00etarako.
Plazan berriro ere Ezpatadantza eta Bandera Dantza eskainiko dituzte, eta jarraian Gipuzkoako dantzen emanaldia izango da.
Ekitaldiari amaiera emateko, herriko bandera udaletxe aurrean itzuliko dute, eta ezpatadantzariak Basozabalera erretiratuko dira.