Ekainaren 4an, urtero moduan, Bilboko Arriaga Antzokiak Bilbo Zaharra Euskaltegiak antolatutako Klasikoen Irakurketa Jarraituaren ekitaldia hartuko du. Aurten ospatzen den 19. edizioan, Txillardegiren "Leturiaren egunkari ezkutua" izango dute hizpide, eta, sei orduz jarraian, lehen euskal eleberri modernotzat jotzen den liburuaren edukia partekatuko dute hainbat pertsonek.

Hitzordu hori hemendik hilabete batzuetara izango bada ere, idazle donostiarraren lanean murgiltzen joateko helburuz, gaur eta bihar bi ekintza egingo dira Euskaltzaindiaren Egoitzan, 19:00etatik aurrera. Alde batetik, bertso-saio literarioa egingo da eta, bestetik, hitzaldi bat, eta bien kasuan sarrera doakoa da.

Paulo Alberdi euskaltegiko irakasle eta ekintza kulturalen arduradunak eman digu egitarauaren berri.