Pasaiako Udal Euskaltegiak XXXII. Kultur Astea ospatuko du otsailaren 2tik 6ra

Actualizado hace 9 minutos

Pasaiako Udal Euskaltegiak XXXII. Kultur Astea antolatu du otsailaren 2tik 6ra bitartean, euskararen eta euskal kulturaren inguruko jarduerak herritarren egunerokora hurbiltzeko asmoz. Egitaraua pasaitar guztiei irekia izango da, eta ohiko moduan, parte-hartzea eta giro komunitarioa izango ditu ardatz.

Antolatzaileek azaldu dutenez, Kultur Astearen helburua da euskaltegiaren jarduna ikasgeletatik harago eramatea, eta euskararen erabilera soziala sustatzea, kulturaren bidez. Horretarako, adin eta profil ezberdinetako herritarrei zuzendutako hainbat ekitaldi prestatu dituzte, formatu askotarikoak uztartuz.

Programa

Egitaraua otsailaren 2an hasiko da, 17.30ean, euskal dantzen tailerrarekin. Saioa Axuri Beltza elkarteko Nerea Videira irakaslearen eskutik izango da, eta parte-hartzaileek oinarrizko dantzak ikasi eta praktikatzeko aukera izango dute, aurretiko esperientziarik izan gabe.

Kultur Asteko hitzordu nagusietako bat, urtero bezala, Santa Agedako koplen irteera izango da. Otsailaren 4an, asteazkenez, 19.00etan, Pasaiako Udal Euskaltegia eta Musika Eskola elkartuko dira koplak kantatzera, Beñat Iguaran eta Josu Ibarguren bertsolarien laguntzarekin. Ekitaldian parte hartuko dute, halaber, euskaltegiko ikasleek, txistulariek, trikitilariek, Illumbe abesbatzak, eta bat egitera animatzen den herritar orok. Gudari plazan elkartuko dira, eta handik Trintxerpeko kaleetan barrena ibiliko dira. Ibilbidea amaitzean, luncha eskainiko da Trintxerpeko Alkateordetzan, parte-hartzaile guztientzat.

Film-emanaldiak eta afaria

Hurrengo egunean, otsailaren 5ean, film-emanaldiak izango dira euskaltegian, ohiko klase-ordutegietan: 7.00etan, 9.30ean, 15.00ean, 17.00etan eta 19.00etan. Antolatzaileek azaldu dutenez, proposamen honen bidez, ikasleei eta herritarrei euskarazko ikus-entzunezko edukiak eskaintzea da asmoa, ikaskuntza prozesua beste formatu batzuen bidez ere aberastuz.

Azkenik, otsailaren 6an, XXXII. Kultur Asteari amaiera emateko, afaria egingo dute Gartziategi sagardotegian. Itxiera-ekitaldi honek astean zehar sortutako giroa borobiltzea eta parte-hartzaileen arteko harremanak sendotzea du xede.

Pasaiako Udal Euskaltegiak herritarrak animatu ditu Kultur Asteko ekitaldietan parte hartzera, eta azpimarratu du halako ekimenek euskararen erabilera sustatzeaz gain, komunitatea trinkotzen laguntzen dutela.