Maiatzaren 9ra arte aurkez daitezke Gasteizko Andre Maria Zuriaren jaietarako kartel proposamena

Gasteizko Udaleko Kultura Zerbitzuak 2025eko Andre Maria Zuriaren jaietarako kartela aukeratzeko lehiaketaren oinarriak argitaratu ditu, eta diseinatu nahi dutenek maiatzaren 9ra arte aurkez dezakete proposamena.

Gasteizko Udaletik jakinarazi dutenez, aukeraketa hiru fasetan egingo da. Lehenengoan, artista bakoitzak hiru eta bost ilustrazio edo diseinu arteko dosier bat aurkeztu beharko du, eta horietatik bi kartelak izan behar dira. Aurreko lanetakoak edo simulazioetakoak izan daitezke.

Lanek ezingo dute sinadurarik izan egilea ez identifikatzeko eta azken lanaren kalitatea eta hautagaiaren ilustrazio edo diseinu laneko estiloa edo gaitasunak baloratzeko.

Txostenak maiatzaren 9ko 13:00ak baino lehen aurkeztu beharko dira Herritarren Arretarako Bulegoetan, egoitza elektronikoaren bidez eta Administrazio Publikoen Administrazio Prozedura Erkidearen 2015eko urriaren 1eko 39/2015 Legeak aurreikusten dituen gainerako legezko moduen bidez.

Hautagaitzak aurkezteko epea itxi ondoren, epaimahaiak bost finalista aukeratuko ditu, eta guztiek kartel proposamen amaituta egin beharko dute. Lan horiek argitaragabeak izan behar dira, inon saritu gabeak, eta ezin dira adimen artifizialarekin egin.

Hautaketa maiatzaren 23an jakinaraziko da, eta kartelaren proposamena ekainaren 9ko 23:59 arte bidali ahal izango da. Azken fasea ekainaren 17an hasiko da, Kultura Zerbitzuak aukeratutako hautagaiari horren berri ematen dionean.

2025eko Andre Maria Zuriaren jaiak iragartzeko aukeratutako kartelak 2.000 euroko saria jasoko du, eta proposamen finalista bakoitzak 500 euro jasoko ditu.