Urnietako Ergoien auzoko Azkorteko ermitak Santa Kruz erromeria hartuko du maiatzaren 3an, igandean, eta goiz osoko egitaraua prestatu dute ospakizunaren bueltan. Herritarrek musika, bertsolaritza eta erlijio ekitaldiak uztartuko dituen jardunaldi batean parte hartu ahal izango dute, giro herrikoian.
Egitaraua 11.00etan hasiko da erromeriarekin, Komerik taldearen eskutik. Ondoren, 12.15ean, bertso saioa izango da, eta bertan ariko dira Unai Gaztelumendi eta Andoni Mujika. Eguna 13.00etako mezarekin osatuko da.
Horrez gain, antolatzaileek jakinarazi dute bertaratzen direnek hamaiketakoa egiteko aukera ere izango dutela erromeriaren esparruan.
Doako autobusa
Jardunaldiaren harira, Azkorterako errepidea itxita egongo da goiz osoan zehar, trafikoa mugatzeko eta ekitaldiaren garapena errazteko. Hori dela eta, doako autobus zerbitzua jarriko da herritarren eskura Azkortera igotzeko. Autobusak Idiazabal kalea 40 gunetik abiatuko dira 10.00etatik 14.00etara, behar beste joan-etorri eginez eskariaren arabera. Antolatzaileek zehaztu dute azken igoera 12.30ean izango dela.
Santa Kruz erromeria Ergoiengo egutegi tradizionaleko hitzorduetako bat da, eta urtero dozenaka herritar biltzen ditu Azkorteko ingurunean, ospakizun erlijiosoa eta herri giroa uztartuz.