Haziaraba Landa Eremuko Arte Estimulazioko Jaialdia Agurainera, Amurriora, Aramaiora, Dulantzira, Iruña Okara, Bastidara, Laudiora, Legutiora eta Oionera itzuliko da udazken honetan. Programazioa azaroaren 13tik abenduaren 22ra egingo da, 0 eta 6 urte bitarteko haurrak dituzten familiei zuzenduta, eta txikitatik artera hurbiltzeko hainbat modu proposatuko ditu, haurren arreta, pertzepzio eta aurkikuntza erritmoak errespetatuz.
Púlsar elkarteak sustatutako proiektuak Arabako Foru Aldundiko Kultura eta Kirol Sailaren, Vital Fundazioaren eta parte hartzen duten udalen finantzaketa du. "Kulturarako sarbidea bizitzako lehen urteetan hasten da, eta Haziarabari esker, Arabako udalerrietako haurrek kalitatezko esperientzia artistikoez goza dezakete etxetik gertu", nabarmendu du ostiral honetan Ana del Val Kulturako foru diputatuak ekimenaren aurkezpenean.
Aboon Teatro konpainiaren 'Baby Esferic' izango da programazio eszenikoko proposamena. 0 eta 6 urte bitarteko haurrei zuzendutako lanak Lurra eta bertako biztanleak omentzen ditu. Hainbat istorio eta paisaiaren bidez, forma esferikoetan inspiratutako estetika fin eta bisualak planetaren magia haurtxo baten erritmoan ezagutzeko gonbita egingo du. Lanak sari garrantzitsuak jaso ditu, bai estatu mailan, bai nazioarteko jaialdietan.
Zinemaren arloan, 'Harri Zopa eta beste zenbait alderantzizko ipuin' eskainiko da, 2 urtetik gorako haurrentzat. Rita&Luca Films banatzailearen bost film labur dira, fantasiaz eta umorez beteak, herri ipuinak eta haurtzaroko ohitura unibertsalak berrinterpretatzen dituztenak. "Zinemako Hontza" izango da istorioen arteko hari gidaria.
Era berean, Arabazan elkarteak euskarazko ahozko narrazio saioak eskainiko ditu, 3 urtetik gorako haurrei zuzenduta, ipuinen inguruan elkartzera eta elkarrekin entzutearen plazeraz gozatzera gonbidatuz publikoa.
"Proposamen artistikoa zaintzen dugu, baita publikoari nola egiten diogun harrera, espazioa nola prestatzen den eta haur bakoitzari bere erritmoan gozatzeko zenbat denbora uzten diogun ere. Udalerriekin elkarlanean aritzea funtsezkoa da hori guztia ahalbidetzeko", azaldu du Ander Elorza proiektuaren arduradunak.
Udal bakoitzak antolatzen du bere herriko jardueretarako sarbidea: batzuk doakoak dira eta beste batzuk ordainpekoak. Ordutegiei, espazioei, erreserbei eta sarreren salmentari edo bilketari buruzko informazioa dagokion udalean kontsultatu beharko da, eta izapideak ere bertan egin.