Gasteizko Udaltzaingoak tresna teknologiko bat probatuko du jaietan segurtasunaren koordinazioa eta kudeaketa hobetzeko

Gasteizko Udaltzaingoak tresna teknologiko berri bat erabiliko du, izaera pilotuarekin, hirian gertatzen denaren ikuspegi osatuagoa denbora errealean izateko, larrialdi zerbitzuen koordinazioa eta segurtasun dispositiboetan erabakiak hartzea erraztuz. Proba Andre Maria Zuriaren jaietan egingo da, jende gehien biltzen duen ekitaldietako bat izanik, udal eta larrialdi zerbitzuen arteko koordinazioa bereziki garrantzitsua delako.

Gasteizko Udaletik jakinarazi dutenez, probaan erabiliko den tresna Axon Fusus da, informazio operatiboa integratzeko plataforma, dagoeneko hainbat hiritako segurtasuneko eta larrialdietako zerbitzuek erabiltzen dutena. Helburua da ebaluatzea nola lagun dezaketen tresna horiek gorabeheren kudeaketa hobetzen, tokian bertan esku hartzen duten taldeen arteko koordinazioa optimizatzen eta larrialdi zerbitzuen jarduerak eskatzen duen edozein egoeraren aurrean erantzun arinagoa ematen.

Horretarako, hiriko kameren zuzeneko bideoa, kartografia eta informazio operatiboa plataforma bakarrean integratu behar dira. Irtenbide horrek egoeraren kontzientzia hobetzen du, koordinazio operatiboa indartzen du eta operazioen zentralak eta polizia agintariek erabakiak azkarrago eta modu arrazoituagoan hartzea errazten du.

"Andre Maria Zuriaren jaiak erronka handia dira antolakuntzari eta segurtasunari dagokienez, jende askok hartzen baitu parte. Koordinazioa errazteko eta informazioa denbora errealean jasotzeko tresnak izateak edozein gorabehera hobeto kudeatzen eta herritar guztientzako jai seguruak eskaintzen lagun diezaguke", adierazi du Segurtasuneko zinegotzi Cesar Fernandez de Landak, plataformaren funtzionamendua bertatik bertara ezagutzeko egindako bisitan.

Jaiegunetatik harago, esperientziak aukera emango du horrelako irtenbideek Udaltzaingoaren eguneroko lanari laguntzeko eta urtean zehar garatzen diren beste larrialdi egoera batzuetan edo dispositibo berezietan koordinazioa hobetzeko garaian erabilgarriak diren ala ez aztertzeko.

Sistemaren prestazioetako bat da Udaltzaingoaren bideozaintza sarean sartu gabeko kameren irudiak denbora errealean ikusteko aukera, aldez aurretik titularrekin adostuta. Sistemaren funtzionaltasunak haratago doaz, hainbat bideo-iturri (trafiko eta segurtasun kamerak, gorputzean eramaten diren kamerak, droneak eta kamera pribatuak) eta datuak aplikazio bisual bakarrean bateratzen baitira, erantzun azkarrak koordinatzeko.

Gasteizko Udalak zerbitzuaren eta herritarrentzako arretaren eraginkortasuna hobetzen lagunduko duten teknologiak txertatzeko egindako apustuaren barruan dago ekimena, betiere datuen babesaren eta pribatutasunaren arloan indarrean dagoen araudia betetzen dela bermatuz.