Gasteizko Udalak beste lokal bat jarri du ekintzaileen eskura Zapatari kalean

Actualizado hace 4 minutos

Gasteizko Udalak beste lokal bat jarri du hiriko ekintzaileen eskura Zapatari kaleko 39 zenbakian, Alde Zaharreko Enpresa Zentroaren barruan. Orain arte erabiltzen ez zen lokala Udalak egokitu du, akabera bikainekin, eta 40 metro koadro, alarma eta komun egokitua, biltegi bat eta horman sartutako armairu bat ditu. Udal Gobernu Taldearen eta EH Bildu udal taldearen arteko 2025eko aurrekontu akordioari esker egingo da proiektua.

Maria Nanclares Ekonomia Sustapen, Enplegu, Merkataritza eta Turismoko zinegotziak eta Rocio Vitero EH Bilduko bozeramaileak lokala bisitatu dute astearte honetan. Nanclaresek ekintzailetzan aritu nahi duten pertsonak animatu ditu Alde Zaharrean kokatutako lokal berrian ezartzera, "oso baldintza ekonomiko erakargarriekin".

"Espazio horretan, negozioa gehienez ere bost urterako ezar daiteke, eta lehen hiru urteetan alokairuaren %50eko laguntza jaso daiteke. Gainera, Udalaren Enpresa Zentroko kide direnez, hainbat zerbitzutarako sarbidea izango dute, hala nola bileretarako gune osagarriak, prestakuntza espezializatua eta mentoretza pertsonalizatuak, azaldu du.

Era berean, Viterok gaineratu du laguntzak laster egongo direla interesdunen eskura, eta ekintzailetza eta negozio berriak abian jartzea dutela helburu. "Gainera, birgaitutako udal lokal batean egingo dute, Alde Zaharreko gure kaleak bizitzaz betetzen jarraitzeko. Azken batean, laguntza horiekin ekin nahi duten guztien ondoan egon nahi dugu, lehen urratsetan lagunduz", esan du.

Espazio berria Udal Enpresa Zentroen sarearen barruan dago. Udal Enpresa Zerbitzuak kudeatzen du sarea, eta honako hauek biltzen ditu: Eskola kaleko Enpresa Zentroa, Hazitegi Komertziala, Enpresa Zentro Irekia (Errementari kalean hiru lokal), eta Mintegi Hedatua (Hedegile kaleko 31, 35B eta 70 zenbakietan dituen egoitzekin, orain Zapatari kaleko 39 zenbakikoa gehituko zaiona).

Alde Zaharreko Enpresa Zentroa Jundizko Enpresen Udal Zentroarekin osatzen da. Zentro horren helburua enpresa sortu berriei ostatu ematea da, horiek finkatzen lagunduko duten estaldura eta laguntza emanez, bulegoekin eta industria pabiloiekin. Nekazaritza sektorean ekin nahi duten pertsonentzat, Gasteizko Udalak Basaldea Nekazaritza Ekologikoko Enpresen Zentroa du haien eskura, Abetxukun.