Gasteizko Florida parkeak izotz pista izango du berriro ere hurrengo hiru Gabonetan

Actualizado hace 9 minutos

Gasteizko Udaleko gobernu batzordeak Florida parkean izotz pista jartzea esleitu du, aurtengo eta hurrengo bi urteetako Gabonetarako, eta Eska Espacios y Eventos enpresa da datozen hiru urteetan izotz pista instalatzeko kontratuaren esleipenduna, guztira 180.000 euroko eskaintza aurkeztu ondoren (BEZa barne).

Ana Lopez de Uralde Kirol zinegotziak azaldu duenez, "pista instalatzeak Gabonetako giro bikaina sortzen du Floridan, eta erakargarritasun ugari eskaintzen dizkie gasteiztarrei. Azken urteotan, espazio hau gogokoenetako bat bihurtu da herritarrentzat, eta Eguberrietan bisitari gehien jasotzen dituen guneetako bat da".

Aisialdirako espazioa izotz naturalezkoa izango da, eta gutxienez 700 metro koadroko azalera izango du. Enpresa esleipendunak haurrentzako patinaje edo ikasteko eremua ere jarri beharko du, gutxienez 75 metro koadroko azalerarekin, pista nagusitik bereizita (hesien bidez).

Halaber, pleguan, izotz-pistak jendearentzat irekita eta funtzionamendu ezin hobean egon beharko duen egunak jasotzen dira, betiere 2026ko abenduaren 11tik 2027ko urtarrilaren 6ra arte, biak barne.

Instalazioa irekitzeko eta ixteko ordutegi tartea ere zehaztu da. Izotz pista irekitzeko gutxieneko ordutegia goizez 10:30etik 14:30era artekoa izango da, eta arratsaldez 16:00etatik 22:00etara artekoa. Abenduaren 24an eta 31n, pistak gutxienez goizeko ordutegia izango du, 10:30etik 14:30era, eta arratsaldeko gutxieneko ordutegia 16:00etatik 20:00etara izango da. Gaueko saio publikoak ere izango dira, 22:00etatik 24:00etara, batez ere gazteei zuzenduta.

Azken bi urteetan, Floridako izotz pista agertoki ezagun eta jendetsuenetakoa bihurtu da. 2024ko Gabonetan 20.569 erabiltzaile izan ziren, eta iaz %10 hazi ziren erabilerak, 22.788ra iritsita.

Baldintza plegu berriak izotz pista jartzea baino ez du aurreikusten, eta alde batera uzten du azken urteotan Ramon y Cajal kalearekiko paraleloan instalatu izan den txirrista. Izan ere, aurreko kanpainan, txirrista erabili zutenen kopurua %68 jaitsi zen eta, ondorioz, Kirol Zerbitzuak txirrista ez jartzea erabaki du.