Arabako Foru Aldundiak, udaberri honetan, adimen desgaitasuna duten pertsonentzako bi etxebizitza berri jarri ditu abian Laudion. Baliabide horrek Aiaraldeko Kuadrillako arreta sarea indartuko du, eta gero eta handiagoa den eskariari erantzungo dio.
Arabako diputatu nagusi Ramiro Gonzálezek eta Gizarte Politiken Saileko diputatu Gorka Urtaranek adimen desgaitasuna duten pertsonentzako etxebizitza berriak bisitatu dituzte gaur arratsaldean, baliabideak kudeatzen dituen elkarte Apdemako lehendakari Carlos Errasti eta kudeatzaile Ana Peñacobarekin batera, bai eta erakundearen Aiaraldeko ordezkari Victoria Garcíarekin ere.
Proiektua bi fasetan garatu da, eta, horri esker, estreinatzeko dauden bi etxebizitza gaitu ahal izan dira, berriak eta erabat irisgarriak, eraikin bereko lehenengo eta bigarren solairuan, eta bakoitza 8 plazarekin. Guztira, baliabideak 16 plaza eskaintzen ditu gaur egun –15 gehi bat atseden egonaldietarako–, eta horrek esan nahi du sei plaza gehiago daudela udalerriko beste eremu batean zegoen eta Apdemak ere kudeatzen zuen baliabide bakarrarekin alderatuta.
Lagundutako etxebizitza horiek ohiko edo aldi baterako bizikidetza guneak dira, mendekotasun mailagatik familia ingurunean arreta egokia jaso ezin duten pertsonentzat. Haietan, banakako laguntzak bermatzen dira diziplina anitzeko talde baten esku hartzearen bidez, eta horrek erabiltzaileen autonomia pertsonala eta gizarteratzea errazten ditu.
Ostegieta plazan daude, Laudioko erdigunean. Baliabide berri horiek bizitza komunitarioan parte hartzea eta inguruko zerbitzuak eskuratzea errazten dute. Etxebizitzek 500 metro koadro baino gehiagoko azalera eraikia dute, gela indibidualetan eta bikoitzetan banatuta, bai eta espazio komunak ere, hala nola sukaldea eta egongela-jangela.
Etxebizitza horiek abian jartzea beste urrats bat da adimen desgaitasuna duten pertsonentzako baliabideak sortzeko Arabako Foru Aldundia azken urteotan egiten ari den bultzadarako, zerbitzu sarea handituz eta eremu horretako itxaron zerrenda murrizten lagunduz.
Bisitan, Ramiro Gonzálezek nabarmendu du "Arabako Foru Aldundia bultzada handia ematen ari zaiola azken urteotan desgaitasuna duten pertsonentzako baliabide berriak sortzeari", eta azpimarratu duenez, "plaza kopurua handitzeak eta arreta sarea hobetzeak erakundearen lehentasun estrategiko bati erantzuten dio". Horiek horrela, gogorarazi du azken zazpi urteetan ehun bat plaza berri sortu direla kolektibo horrentzat Araban.
Era berean, diputatu nagusiak nabarmendu du ekipamendu berri horrek indartu egiten duela Aiaraldeko Kuadrillako gizarte zerbitzu espezializatuen presentzia, orain arte ez baita egon adimen desgaitasuna duten pertsonentzako eguneko zentrorik. Izan ere, baliabide hori Laudion ezartzeko azken fasean, aurreikusita dago urte honen amaieran eguneko zentroa martxan jartzea, 16 plazako edukierarekin, zeina eraikinaren beheko solairuan eta solairuartean gaitzen ari baita. Zerbitzu berri horri esker, espazio berean eskainitako arreta integrala osatu ahal izango da, Laudioko laguntza komunitarioen eredua sendotuz.
Jarduketak 2 milioi euro inguruko inbertsioa izan du, batez ere Europako Next Generation EU funtsen bidez finantzatuta, Berreskuratze, Eraldaketa eta Erresilientzia Planaren esparruan, eta Aiaralderako Berehalako Jarduketa Planarekin osatuta.