Eusko Jaurlaritzako gobernu kontseiluak Mahastizaintzako eta Ardogintzako Esku Hartze Sektorialaren (ISV Sustapena) programa hirugarren herrialdeetan sustatzeko eta komunikatzeko 2027rako laguntzen deialdia egiten duen agindua onartu du. Deialdiak 8,5 milioi euroko aurreikuspen ekonomikoa jasotzen du Euskadiko ardoak hirugarren herrialdeetako nazioarteko merkatuetan sustatzeko jarduerak finantzatzeko.
Jaurlaritzaren arabera, ekintza horien helburua sektore estrategikoaren lehiakortasuna eta kanpo posizionamendua indartzea da. "Sektore horrek ardo bereziak, kalitatezkoak eta lurraldearekin lotura estua dutenak eskaintzen ditu, balio erantsia, jarduera ekonomikoa eta enplegua sortzeko gai direnak", nabarmendu du.
ISV Sustapena programa Nekazaritza Politika Erkidearen Plan Estrategikoaren Mahastizaintza eta Ardogintza Arloko Esku Hartzearen barruan dago, eta Nekazaritza Bermatzeko Europako Funtsaren bidez finantzatzen da.
Sustapenean parte hartu ahal izango dute jatorri-deitura babestu batek edo adierazpen geografiko babestu batek jasotako kalitatezko ardoek, bai eta ardoa egiteko erabilitako mahats-barietate edo barietateak adierazten dituztenek ere, baldin eta zuzeneko kontsumorako badira. Laguntzak aurreikusten dituen sustapen-ekintzak Europar Batasunetik kanpoko edozein herrialdetan egin ahal izango dira, merkatu berriak irekitzeko eta euskal ardoek kanpoan duten posizionamendua indartzeko helburuarekin.
Programek zehaztu beharko dute zein merkatutara zuzentzen diren, zer ardo mota sustatuko duten eta zer jarduerak aurreikusten diren, eta ekintzen aurrekontu xehatua ere aurkeztu beharko dute. Kostuak merkatuko ohiko prezioetara egokitu beharko dira, eta enpresa independenteen aurrekontuen bidez justifikatu. Diruz lagundu ahal izango dira 2027ko martxoaren 1etik abenduaren 31ra bitartean garatzen diren sustapeneko eta komunikazioko programak eta ekintzak.
ONURADUNAK
Laguntzak eskatu ahal izango dituzte mahastizaintza eta ardogintzaren sektoreko enpresek, ekoizleen erakundeek eta horien elkarteek, sektoreko lanbide arteko erakundeek eta profesionalek, eta jatorri-deiturak eta adierazpen geografiko babestuak kudeatzeko eta ordezkatzeko organoek.
Halaber, laguntzen onuradun izan daitezke ekoizle-elkarteak, mahastizaintzako eta ardogintzako kooperatibak, sektoreko enpresek soilik osatutako irabazi-asmorik gabeko erakundeak eta kanpo-sustapenean eskumenak dituzten erakunde publikoak, betiere laguntzen onuradun bakarrak ez badira. Ardogintzako enpresen kasuan, eskabidea aurkeztu aurretik eratuta egon beharko dute.