Errenteriako Bertso Festak 35. urteurrena ospatuko du urriaren 17an, larunbatean, Niessen Kulturgunean. Herriko kultur egutegian hiru hamarkada baino gehiagoz lekua izan duen ekitaldiak bertsolaritzako izen ezagunak bilduko ditu aurten ere, eta bertsoa beste diziplina artistiko batzuekin uztartzeko ohiko apustuari eutsiko dio. Saioa 19.00etan hasiko da.
Aurtengo edizioan Andoni Egaña, Alaia Martin, Amets Arzallus, Maddalen Lujanbio, Unai Iturriaga eta Jon Maia izango dira oholtza gainean. Amaia Agirrek egingo ditu gai-jartzaile lanak, bertsolarien saioa gidatuz.
Bertso saioaren aurretik, gainera, bertsoa eta dantza uztartuko dituen emanaldia izango da. Alain Maya eta La Pulga dantzariek eta Hilario Rodeiro musikariak Alaia Martin eta Andoni Egañarekin batera eskainiko dute ikuskizuna. Horrela, Bertso Festak beste adierazpide artistiko batzuei ere lekua egingo die bere urteurreneko hitzorduan.
Bertso Festaren kartela.
Sarrerak 12 euroan daude salgai, eta aldez aurretik erosi ahal izango dira Landare eta Arkaitza tabernetan, baita online ere, sarrerak.errenteria.eus webgunearen bidez.
35 urteko ibilbidea, euskal kulturaren alde
Bertso Festaren lehen edizioa 1992an egin zen, eta ordutik urtero antolatu da, lehenik Landare elkartearen eta ondoren Erein elkartearen eskutik. Urte hauetan guztietan, ekimenak puntako bertsolariak ekarri ditu Errenteriara, eta bertsolaritzari zein euskal kulturari herrian plaza bat eskaintzea izan du helburu.
Ibilbidean zehar, formatuak eta ekitaldiaren kokalekuak aldaketak izan dituzte, baina antolatzaileek hasierako xedeari eutsi diote. Bertsoa beste diziplina artistiko batzuekin uztartzea eta belaunaldi berriei tokia egitea ere izan dira jaialdiaren ezaugarrietako batzuk.
35. edizioak, beraz, bertsoz gozatzeko aukera ez ezik, Errenteriako kultur egutegian sustraitutako ekimen baten ibilbidea gogoratzeko parada ere eskainiko du.