Azkoitiko kultur agendak 2026ari indartsu ekingo dio Baztartxo Antzokian

Azkoitiko kultur agendak indar handiz ekingo dio 2026. urteari, batez ere Baztartxo Antzokian antolatutako ekitaldiei esker.

Urtarrilean zehar, antzerkia eta musika izango dira protagonista, herritar guztientzako eskaintza zabalarekin.

Antzerkia eta musika

Urtarrilaren 17an, Txalo Produkzioaken “Trajea” komedia beltza izango da ikusgai. Joseba Apaolaza eta Xabier Hormaza aktoreek protagonizatutako lanak merkealdien lehen eguneko egoera bat eta istripu bat hartzen ditu abiapuntu.

Aste bat geroago, urtarrilaren 24an, Artedrama+Axut konpainiek “Nor naizen baneki” lana eskainiko dute, eta hilaren 31n Olaia Intziarte kantaria igoko da Baztartxoko oholtzara.

Urtarrileko emanaldi horietarako sarrerak jada salgai daude www.entradium.eus atarian.

Go!azen 12.0

Otsailean ere ez da kultur eskaintza etengo. Hilabeteko hitzordu nagusietako bat Go!azen 12.0 kontzertua izango da, otsailaren 21ean Baztartxo Antzokian.

Emanaldi arrakastatsu honek bi saio eskainiko ditu, 16.00etan eta 18.30ean, eta sarrerak eskuragarri daude www.azkoitia.eus/agenda eta www.entradium.com webguneetan.

Argumentua

Go!azen 12.0-ren argumentuak Basakabi udalekua eramango ditu ikusleak. Aurten, Maitanek ideia berritzailea izan du:

Basakabi “bigarren aukeren” udaleku bihurtzea. Hala ere, Garaziri bere asmoen berri eman gabe egin du, eta ondorioz, arazoak dituzten gaztez beteko da udaleku ospetsua.

Egoera horretan, uda zaila izango dute Garazik eta Maitanek Basakabin.

Gazte berriek iskanbilak sortuko dituzte, eta egoera are gehiago korapilatzeko, Kuxkuxero izeneko pertsona batek ikasle guztien inguruko informazioa sareetan zabalduko du.

Maitasuna, anaien arteko gorrotoa, mendekua eta, jakina, abesti berri ugari izango dira istorioaren osagai nagusiak.