Arabako Foru Aldundiak ekonomia zirkularreko, industrializazio jasangarriko, energia garbietako eta ekodiseinuko Jardunbide Egokien Sariak deitu ditu

Actualizado hace 9 minutos

Arabako Foru Aldundiak ekonomia zirkularreko, industrializazio jasangarriko, energia garbien ezarpeneko eta ekodiseinuko Jardunbide Egokiak aitortzeko Sariak deitu ditu. Ekimen honen helburua da planeta errespetatuko duen eredu ekonomiko jasangarriago, lehiakorrago eta berritzaileago baterantz aurrera egiten laguntzen duten proiektu berritzaileak ikusaraztea eta aitortzea.

Sari horiek Arabako Foru Aldundiko Arlo Estrategikoen Zuzendaritzak bultzatzen ditu, Diputatu Nagusiaren Sailari atxikita, eta teknologia garbiak, ingurumenaren ikuspegitik arrazionalak diren prozesuak, ekonomia zirkularreko irizpideak, energia berriztagarriak edo ekodiseinuko soluzioak beren jardueran txertatzen dituzten Arabako enpresa eta erakundeen lana balioestea dute helburu.

Deialdiak 5.000 euroko lehen saria, 3.000 euroko bigarren saria eta 2.000 euroko hirugarren saria izango ditu. Horrez gain, aurkeztutako proiektuek ikusgarritasun publikoa eskuratu ahal izango dute Arabako Foru Aldundiaren komunikazio-kanalen bidez, eta hiru erakunde finalistak ekonomia zirkularreko, industrializazio jasangarriko, energia garbietako eta ekodiseinuko jardunbide egokiak zabaltzeko jardunaldi batean parte hartzera gonbidatuko dira.

Era berean, erakunde irabazleetako batek ate irekien bisita bat egin ahal izango du bere instalazioetan, garatutako jardunbide egokia “in situ” azaltzeko. Bisita hori Kudeaketa Aurreratuaren Europako 32. Astearen jardueren barruan egingo litzateke, 2026ko urriaren 14tik 28ra bitartean.

Deialdi honek azken urteetan egindako aitorpenen ibilbideari jarraipena ematen dio, eta aukera eman du jasangarritasunaren, berrikuntzaren eta trantsizio industrialaren arloan erreferente diren Arabako proiektuak ikusarazteko. 2025ean, Arabako Foru Aldundiak Optimus 3D saritu zuen fabrikazio aditiboaren alde egindako apustuagatik, materialen kontsumoa eta karbono-aztarna murrizteko tresna gisa; Gasteiz On, tokiko merkataritzan Garapen Jasangarrirako Helburuak zabaltzeko egindako kanpainagatik; eta AJL Ophthalmic, energia-eraginkortasunaren eta ekonomia zirkularraren aldeko estrategia integralagatik.

2024ko edizioan, sariek A&B Laboratorios de Biotecnología aitortu zuten, ekodiseinuan oinarritutako deskarbonizaziorako ekintza anitzeko metodologiagatik; Gasteiz On, Hostelería #PorElClima programagatik; eta Estampaciones Rubí, Mercedes-Benzek Vitoria-Gasteizen VAN EA ibilgailua fabrikatzeko duen lineari lotutako prozesu baten hobekuntzagatik.

Sari hauetara edozein sektore ekonomikoko erakundeak aurkeztu ahal izango dira, baldin eta nortasun juridikoa badute eta egoitza, helbide soziala edo zentro irekia Arabako Lurralde Historikoan badute. Sektore publikoko erakundeak kanpo geratuko dira.

Aurkeztu ahal izango diren jardueren artean daude ekonomia zirkularrari lotutako negozio-eredu berriak, materialak produkzio-zikloetan berriz sartzeko proiektuak, karbono-aztarna kalkulatzeko, murrizteko eta konpentsatzeko ekimenak, materialen balorizazioa eta hondakinen murrizketa, ekodiseinua, ingurumen-inpaktu txikiagoko materialen erabilera, energiaren eta uraren baliabideen optimizazioa, energia berriztagarrien ezarpena, teknologia garbien erabilera edo ingurumen-inpaktuak murriztera bideratutako digitalizazioa.

Halaber, baloratuko dira bizi-zikloaren analisia txertatzen duten proiektuak, produktuen ingurumen-adierazpenak edo etiketa ekologikoak lortzea, ingurumen-kudeaketako sistemak ezartzea, hornitzaileengan eta interes-taldeetan eragitea, hazkunde jasangarria eta pertsonengan zein gizartean inpaktu positiboa sortzea.

Hautagaitzak telematikoki aurkeztu beharko dira Arabako Foru Aldundiaren egoitza elektronikoaren bidez, sari horietarako berariaz gaitutako izapidean. Eskaerak aurkezteko epea 2026ko uztailaren 8ra arte egongo da zabalik.

Deialdi honen bidez, Arabako Foru Aldundiak jasangarritasunarekin, berrikuntzarekin eta industria garbiago eta eraginkorrago baterako trantsizioarekin duen konpromisoa indartzen du, eta lurraldean inpaktu positiboa duten jardunbide egokiak bultzatzen ari diren erakundeen ahalegina aitortzen du.

Ekimen hau Garapen Jasangarrirako Arabako Aliantzaren esparruan kokatzen da, eta Ihobe eta Euskalit erakundeen lankidetza du.