Araba Vitoria-Gasteiz Klasikoa txirrindularitza lasterketaren zazpigarren edizioa jokatuko da larunbatean, ekainaren 13an, irteera eta helmuga hiriburuan direla, eta lurraldearen zati handi bat zeharkatuko duen ibilbidearekin. 26 taldetako 200 bat txirrindulari gazte bilduko dira, ostegun honetan aurkezpenean azaldu dutenez.
Gasteizko Udaleko Kirol eta Osasun zinegotzi Ana Lopez de Uralde, Arabako Aldundiko Kultura eta Kiroleko foru diputatu Ana del Val, Laboral Kutxako komunikazio arduradun Kepa Ortiz de Urbina eta lasterketaren zuzendari tekniko David Cotillas izan dira agerraldian.
Kirolariak Espainiako Estatuko bederatzi autonomia erkidegotatik iritsiko dira, eta Alimco Campagnolo taldeak ordezkatuko du Araba. Gainera, klasikoak kanpoko parte hartzea izango du lehen aldiz, Occitane Cyclisme Formation talde okzitaniarrarekin.
Araba Vitoria-Gasteiz Klasikoaren irteera eta helmuga Aretxabaletan egongo dira, eta, beste behin, Espainiako Junior Koparen barruan sartuta dago, denboraldiko zazpigarren lasterketa puntuagarria izango baita.
Inurri Sport Club Deportivok antolatutako lasterketaren irteera neutralizatuan 11:00etan izango da, Aretxabaleta merkataritza gunetik; 11:10ean emango zaio irteera ofiziala, eta 2.000 metroko desnibela duen 140 kilometroko ibilbide bihurgunetsua egin beharko dute txirrindulariek. Tartean, Zaldiaranera hiru igoera eta Gasteizko mendatera bi igoera izango dira.
Orain arte sei edizio bakarrik jokatu diren arren, Araba Vitoria-Gasteiz Klasikoa talentu gazteen erakusleiho bihurtu da tropel profesionalera eta UCI World Tour taldeetara jauzi egiteko orduan.
Hain zuzen ere, Arabako lasterketaren irabazleen zerrendan gaur egun profesionalak diren eta aurreko edizioetan podiuma zapaldu edo proba irabazi duten txirrindulariak daude, hala nola Gorka Corres arabarra (Caja Rural), Hugo de la Calle (Burgos Burpellet BH) edo Enekoitz Azparren klasikoaren lehen irabazlea (orain Euskaltel taldeko txirrindularia).
Eñaut Urkaregi iazko irabazleak ere Lidl Trekera egin du jauzi denboraldi honetan. Duela bi urte garaile izan zen Adria Pericas eta 2020an bigarren izan zen Igor Arrieta ere UAE taldeko txirrindulariak dira denboraldi honetan. Arrietaren kasuan, txirrindulari nafarrak bigarren amaitu zuen klasikoaren lehen edizioan (2020), eta amaitu berri den Italiako Giroan bosgarren etapa irabazi du.